Búgin Ǵylym jáne joǵary bilim mınıstrliginiń uıymdastyrýymen elimizdiń ekonomıkalyq ósýiniń negizi retinde adamı kapıtaldy damytýǵa arnalǵan joǵary bilim jáne ǵylym forýmy ótti, dep habarlaıdy Egemen.kz Úkimettiń baspasóz qyzmetine silteme jasap.
Forým bilim jáne ǵylym salasynyń qyzmetkerlerin, JOO jáne ǴZI ókilderin, Qoǵamdyq keńes múshelerin, jas ǵalymdar men stýdentterdi, sheteldik jáne otandyq sarapshylardyń basyn qosty.
Forýmnyń plenarlyq otyrysyn ashqan Premer-mınıstr Álıhan Smaıylov sharaǵa qatysýshylardy vıdeo arqyly quttyqtap, eldiń ekonomıkalyq ósýi úshin joǵary bilim men ǵylymdy damytýdyń mańyzdylyǵyn atap ótti.
«О́zderińiz bilesizder, ǵylym men joǵary bilimniń damý máseleleri Memleket basshysynyń – jiti nazarynda. Sondaı-aq aldymyzda ǵylym salasyn qaıta qaraý mindeti tur. Osy baǵytta ǵylymdy basqarýdyń jańa modeline kóshe bastadyq», dedi Premer-mınıstr.
Premer-mınıstrdiń orynbasary Tamara Dúısenova joǵary bilim men ǵylymnyń eldiń ınnovasııalyq damýy men el jastarynyń kásibı daǵdylaryn arttyrýdaǵy mańyzyna toqtaldy.
«Úkimet Memleket basshysynyń tapsyrmasy negizinde joǵary bilim men ǵylymdy damytý, sondaı-aq jekelegen problemalar men negizgi máselelerdi sheshý boıynsha sharalar qabyldady. Sheteldiń jetekshi ýnıversıtetteriniń fılıaldaryn ashyp jatyrmyz. Bul bilim sapasyn arttyrýǵa, tájirıbelermen bólisip, elimizdiń joǵary oqý oryndarynyń básekege qabilettiligin arttyrýǵa baǵyttalǵan», dedi Tamara Dúısenova.
Ǵylym jáne joǵary bilim mınıstri Saıasat Nurbek túrli ýnıversıtetter men ǵylymı-zertteý ınstıtýttary arasyndaǵy yntymaqtastyqtyń mańyzy týraly aıtyp, sondaı-aq álemge tanylǵan tabysty jobalardyń mysaldaryn keltirdi.
«2023-2025 jylǵy ǵylym salasynyń jalpy bıýdjeti 3,5 ese ósip, 643 mlrd teńgeni qurady. Memleket basshysynyń tapsyrmasyn iske asyrý aıasynda ǵalymdardyń mártebesin kóterý jáne kadrlyq áleýetti nyǵaıtý boıynsha jumystar júrgizildi. Ǵalymdardyń jalaqysy 2 ese ósti. Ortasha jalaqy – 257 myń teńge, eń joǵarysy 1,5 mln teńgege deıin jetedi. Zańnamany jetildirý jáne ǵylymdy bıýrokratııadan aryltý sheńberinde halyqaralyq tájirıbeni eskere otyryp, Ǵylym jáne tehnologııalar jónindegi ulttyq keńes quryldy, ekonomıkanyń strategııalyq salalary boıynsha ǵylymı-tehnologııalyq damýdyń jol kartalary qabyldandy», dedi mınıstr.
Sonymen qatar forýmda Heriot-Watt University prorektorynyń orynbasary (akademııalyq basshylyq), Tadhg O'donovan, Qazaqstandaǵy De Montfort ýnıversıtetiniń prezıdenti Sakina Zafar, QR Prezıdenti janyndaǵy Ulttyq ǵylym akademııasynyń vıse-prezıdenti Asqar Jumadildaev jáne basqa da sarapshylar sóz sóıledi.
Joǵary bilim jáne ǵylym forýmy – Qazaqstannyń bilim berý salasyndaǵy mańyzdy oqıǵa. Ol dıalog alańy bola otyryp, tájirıbe almasýǵa jáne jańa damý strategııalaryn daıyndaýǵa múmkindik beredi. Forýmda usynylǵan ıdeıalar men keńester Qazaqstannyń joǵary bilim jáne ǵylym salasyndaǵy ustanymdaryn nyǵaıtýǵa yqpal etpek.