Bul – Qazsport kommentatorynyń Baqtııar Zaınýtdınov gol soqqan sátindegi jar salǵan júrekjardy sózi. Iá, búkil qazaqtyń kógildir ekranǵa telmirip, Eýropaǵa ketken balanyń qadamynan kútkeni osy edi.
Úkilegen úmittiń údesinen shyǵyp, Qazaqstan quramasynyń jartylaı qorǵaýshysy Baqtııar Túrkııanyń «Beshıktash» komandasy sapyndaǵy alǵashqy oıynynda birinshi golyn saldy. Bul ári jeńis goly bolǵandyqtan, Baqtıerdiń debıýtin jarqyrata tústi.
Osynaý tarıhı sátke túrkııalyq klýbtyń Konferensııa lıgasynyń pleı-off satysynda Ýkraınanyń «Dınamo Kıev» komandasyna qarsy oıynynda kýá boldyq. Qazaq halqy dál osy matchtan jaqynda ǵana «Beshıktash» klýbyna aýysqan Baqtııar Zaınýtdınovtiń debıýtin asyǵa kútti. Oıynǵa ekinshi taımda qosylǵan otandasymyz ózine artylǵan senimdi tolyqtaı aqtady. Tarazy basy teńesip, qaı jaǵyna aýary belgisiz teńselip turǵan shaqta Zaınýtdınovtiń oıyn sońyna taman soqqan golynyń salmaǵy basyp ketti. Matchtyń 94-mınýtynda Baqtııar komandalasy Mılot Rashısanyń aldyna qolmen qoıǵandaı ádemi pas shyǵarǵan, biraq ol dopty yrqyna kóndirem degenshe qorǵaýshy aldyn jaýyp úlgerdi. Osy sátte Rashısa aıyp alańyna enip úlgergen Baqtııarǵa pas berdi. Al Baqtııar dopty birden qaqpaǵa baǵyttap, jeńis golyn jarq etkizdi. Osylaısha, jarqyn debıýtimen qazaq jurtyn ǵana emes, túrik baýyrlarymyzdy da qýanyshqa bóledi.
Eske sala ketsek, Baqtııar Zaınýtdınov ótken aptada ǵana máskeýlik SSKA klýbynan ystanbuldyq «Beshıktash» klýbyna aýysty. Transfer quny 4,5 mln eýrony qurady. Al otandasymyzben kelisimshart 4 jylǵa jasaldy jáne onyń maýsymdyq jalaqysy 1,2 mln eýro bolmaq.
Taraz fýtbol mektebiniń túlegi Baqtııardyń budan bylaı Eýropadaǵy úzdik lıgalardyń birinde dop tebetini bárimizdiń kóńilimizdi bir kóterip qoıdy. О́ıtkeni qazaq jastarynyń eń úzdik klýbtarda oınaǵanyn otandastarymyz kópten beri armandap keledi. Sondyqtan Baqtııardyń da, basqa da ulttyq qurama oıynshylarynyń da bolashaǵynan kúterimiz kóp!