Májilis tóraǵasy Erlan Qoshanov qazaqstandyqtardy Konstıtýsııa kúnimen quttyqtady, dep habarlaıdy Egemen.kz.
«Ardaqty aǵaıyn! Barshańyzdy Konstıtýsııa kúnimen shyn júrekten quttyqtaımyn! Bul merekeniń barlyq qazaqstandyq úshin mańyzy erekshe. О́ıtkeni, Ata zańymyz – eldik pen egemendiktiń altyn dińgegi, órleý men jańǵyrýǵa jol bastaǵan elimizdiń basty qujaty. Byltyr Memleket basshysy Qasym-Jomart Kemeluly Toqaevtyń uıytqy bolýymen Konstıtýsııanyń úshten bir bóligi jańaryp, negizgi saıası ınstıtýttar qaıta túledi. Bul qadam birinshi kezekte ádiletti memleket qurýǵa baǵyttalyp otyr. Osylaısha el damýynyń jańa dáýiri bastaldy deýge bolady», delingen quttyqtaýda.
Erlan Qoshanov búginde Ata zańymyz ádildik pen teńdiktiń sımvolyna aınalǵanyn aıtty. Ár qazaqstandyq úshin birdeı múmkindikterge jol ashyldy. Azamattardyń konstıtýsııalyq quqyqtaryn tolyq júzege asyrýǵa jaǵdaı jasaldy.«Biz alǵan baǵytymyzdan taımaı, Prezıdentimizge tirek bolyp, kózdegen maqsattarǵa halqymyzben birge qol jetkizemiz. Osy joldy elimizge baq-bereke, ár shańyraqqa shattyq tileımin! Birligimiz nyǵaıyp, tabysymyz arta bersin! Elimiz aman, jurtymyz tynysh bolsyn!», dedi E.Qoshanov.