Joldaýda el damýyna serpin beretin kóp másele aıtyldy. Sonyń ishinde birnesheýin erekshe atap ótkim keledi. Birinshiden, Sý jáne ırrıgasııa mınıstrligi qurylady. Bul men saılanǵan Ulytaý oblysy úshin óte mańyzdy. Betpaqdalanyń shekarasynda ornalasqandyqtan, sý tapshylyǵy – úlken másele. Sol sebepti bul qadam oblysqa tyń serpilis beredi dep esepteımin.
Ekinshisi, Kólik mınıstrligi qurylmaq. Jol máselesi Ulytaý oblysy úshin de óte ózekti ekeni belgili. О́ıtkeni óńir elimizdiń dál ortasynda ornalasqan. Qyzylorda men Jezqazǵan tasjoly áli salynyp bitken joq. Jańadan qurylatyn mınıstrlik jol qurylysyna úlken serpin beredi dep senemin.
Taǵy bir aıta keterligi, Memleket basshysy «Otbasy bank» jumysyn qaıta qaraý týraly tapsyrma berdi. Buryn onyń bólimsheleri oblys ortalyqtarynda ǵana bar-tuǵyn. Endi monoqalalarǵa, aýyldy jerlerge «Otbasy bank» jumysy qoljetimdi bolady.
Joldaýda aıtylǵan ózekti taqyryptyń biri – zorlyq-zombylyqqa qatysty. Prezıdent kámelet jasyna tolmaǵan balalarǵa zorlyq-zombylyq jasaǵandarǵa jazany kúsheıtýdi talap etip otyr. Bul da – qazirgi qoǵamdaǵy kúıip turǵan máseleniń biri.
Joldaýda aıtylǵan tapsyrmalar oryndalsa, ekonomıkalyq turǵydan nyǵaıýǵa jol ashylady. Ekonomıkanyń damýyn 2029 jylǵa deıin eki ese ósirýge múmkindik týatyny anyq. Endi alǵa qoıylǵan baǵyttar boıynsha jumys isteý kerek.
Erbolat SATYBALDIN,
Májilis depýtaty