Prezıdent Joldaýynan bilim salasyna qatysty negizgi úsh máseleni oıǵa túıdim. Olar: birinshiden, mektep jasynan sýdy únemdeý mádenıetin qalyptastyrý, ekinshiden, balalardyń qarjylyq saýatyn arttyrý, úshinshiden, bilim oshaqtarynda qaýipsizdik pen jaýapkershilikti kúsheıtý.
Bul baǵyttarda, árıne, burynnan jumys júrgizilip keledi. Alaıda bul jumystardy jańa ýaqyt talaptaryna saı jetildirý kerek. Memleket basshysy «Adal azamat jáne tuǵyrly tulǵa bolýdyń negizi bala kezden qalyptasady. Sondyqtan biz jas urpaqtyń qaýipsiz ári alańsyz ómir súrýin qamtamasyz etýge tıispiz», dep atap ótti.
Keıingi ýaqytta balalar arasyndaǵy zorlyq-zombylyq problemasy qoǵamdy alańdatyp júrgenin bilesizder. Biz óz tarapymyzdan býllıng jaǵdaıyn boldyrmaý úshin fın tájirıbesin zerttep jatyrmyz. Ol elde «Kıvı» degen baǵdarlama qabyldanǵan. Keıingi on jyldyń ishinde atalǵan baǵdarlamanyń arqasynda Fınlıandııada býllıng birneshe ese tómendegen. Biz bul tájirıbeni ózimizdiń bilim salasynda qoldaný jaǵyn pysyqtap, zerdelep jatyrmyz.
Aıta ketsek, baǵdarlama mektep ákimshiligi men ata-ana arasyndaǵy áriptestikti kúsheıtý arqyly býllıngke ushyraǵan balalardy tyǵyryqtan alyp shyǵýǵa baǵyttalǵan. Onyń ishinde mekteptegi psıhologııalyq jumysty kúsheıtý baǵyty da bar. Búgingi tańda osy psıhologııalyq jumystar boıynsha da mektepterde naqty is-sharalar ótkizýdi josparlap otyrmyz. Onyń ishinde pedagog-psıhologterdiń biliktiligin arttyrý, olardyń jumys isteıtin baǵdarlamalaryn jańǵyrtý, sonymen qatar ár óńirde psıhologterge arnalǵan ortalyqtar qurý sekildi bastamalar bar.
Ǵanı BEISEMBAEV,
Oqý-aǵartý mınıstri