Memleket basshysy Qasym-Jomart Toqaev Qazaqstan halqyna Joldaýynda el damýynyń aldaǵy kezeńdegi basym baǵyttaryn belgilep berdi. Osylaısha, ekonomıkalyq saıasattyń jańa modeline kóshýdiń naqty jáne tıimdi tetikteri aıqyndaldy. Olar ádildik, ınklıýzıvtilik, tıimdilik jáne pragmatızm qaǵıdalaryna taban tireıdi. Usynylǵan sharalar ekonomıkadaǵy qurylymdyq ózgeristerge jáne azamattardyń ómir súrý sapasyn jaqsartýǵa arnalǵan.
Ulttyq bıznestiń múddesin qorǵaý, shaǵyn jáne orta kásipkerlikti qoldaý da Prezıdentimizdiń erekshe nazarynda. Sondaı-aq Joldaýda ınvestısııa tartý boıynsha naqty sharalar kórsetildi. Osy rette óńdeý ónerkásibine serpin berý úshin sheteldik jáne otandyq ınvestorlar alǵashqy úsh jylda salyqtan bosatylatynyn basa aıtý kerek.
Reformalardyń mańyzdy baǵyttarynyń biri – salyq jáne bıýdjet zańnamasyn odan ári jetildirý. Bul rette Parlament Úkimetpen birlesip, eldegi kásipkerlik jáne ınvestısııalyq ahýaldy jaqsartý jónindegi tetikterdi pysyqtaıdy.
Sonymen qatar Memleket basshysy sý resýrstaryn utymdy paıdalaný máselesine erekshe kóńil bóldi. Osy salada qordalanǵan problemalardy júıeli sheshý úshin jeke mınıstrlik qurylady. Mundaı qadam elimizdegi sý qaýipsizdigi máselelerin maqsatty túrde sheshýge jáne salany josparly damytýǵa múmkindik beredi.
Prezıdentimiz kólik-logıstıka salasyn da odan ári damytý jóninde naqty tapsyrmalar berdi. Jańa bastamalar elimizdiń qýatty logıstıkalyq áleýetin tıimdi iske asyrýǵa jol ashatyny anyq. Jańadan qurylǵan Kólik mınıstrligi osy baǵyt boıynsha keshendi jumystar júrgizedi.
Joldaýda negizgi naryqtardy demonopolızasııalaý, memlekettiń ekonomıkaǵa yqpalyn azaıtý boıynsha qajetti sharalar qabyldaý kerektigi de aıtyldy. Bul bastamalar elimizdegi kásipkerliktiń jandanýyna oń áserin tıgizedi.
Odan bólek, Úkimet pen Parlament bank júıesiniń tıimdiligin jáne onyń el ekonomıkasyna qosatyn úlesin arttyrýǵa kómektesetin zańnamalyq túzetýlerdi qaraýy qajet. Osy baǵyttaǵy normalar ulttyq tabysty barynsha ádil bólýge yqpal etedi.
Demografııalyq úderisterdi eskere otyryp, búgin Memleket basshysy «Keleshek» atty jańa baǵdarlama ázirleý týraly bastama kóterdi. Bul – balalardyń bilim alýy úshin bastapqy kapıtaldy jınaqtaýǵa kómegin tıgizetin mańyzdy qadam.
Sondaı-aq Prezıdentimiz Joldaýda óńirlerdiń bıýdjet salasyndaǵy derbestigin arttyrýǵa arnalǵan naqty tapsyrmalar berdi. Soǵan sáıkes salyq tólemderiniń bir bóligin aımaqtarǵa berý kózdelip otyr. Budan bylaı aýdandyq ákimdikter bıýdjetti ózderi jasaqtaı alady. Bul, óz kezeginde, jergilikti jerdegi memlekettik basqarýdyń tıimdiligin arttyrady.
Osy rette ákimshilik reformanyń jalǵasatynyn atap ótý qajet. Soǵan sáıkes Úkimet músheleri men ákimderdiń jaýapkershiligi artady. Memlekettik josparlaý barynsha jınaqy jáne ıkemdi bola túsedi.
Memleket basshysynyń osy jáne ózge de bastamalary, eń birinshi kezekte, azamattarymyzdyń ál-aýqatyn arttyrýǵa jáne ekonomıkamyzdy ártaraptandyrýǵa baǵyttalǵan. Qazirgi tańda álemdegi ahýal óte kúrdeli. Atalǵan bastamalardy iske asyrý osy sheshýshi kezeńde elimizdiń teńgerimdi jáne sapaly damýyna tyń serpin beredi.
Osy oraıda erekshe nazar aýdaratyn jaıt, aıtylǵan tapsyrmalardyń basym bóligi úsh jyldyń ishinde júzege asýǵa tıis.
Ekonomıkalyq damýdyń jańa tásilderin iske asyrý úshin berik quqyqtyq baza qajet. Sondyqtan Prezıdentimizdiń barlyq reformasyn zańnamalyq turǵydan qamtamasyz etý asa mańyzdy. Bul rette Parlament Senaty Májilistegi, Úkimettegi áriptesterimen, sarapshylarmen jáne múddeli taraptarmen árdaıym belsendi jumys isteıdi.
Qoryta kelgende, ekonomıkalyq saıasattyń jańa úlgisin júzege asyrý elimizdiń turaqty, sapaly ári uzaqmerzimdi ekonomıkalyq damýyna negiz bolady. Bul bastamalardyń barlyǵy Ádiletti Qazaqstan qurý isine eleýli úles qosatyny sózsiz.
Máýlen ÁShIMBAEV,
Senat tóraǵasy