Tártip saqshylary Batys Qazaqstan oblysyndaǵy Araltóbe aýylynda atys uıymdastyrǵan kúdiktini qolǵa túsirdi, dep jazady Egemen.kz.
Aıta ketsek, atys kezinde birneshe adam jaraqat alǵan.
Oblystyq polısııa departamentiniń baspasóz qyzmeti usynǵan aqparatqa sáıkes, 5 qyrkúıekte alkogoldi ishimdikke masaıǵan sharýa qojalyǵynyń basshysy men aýyl turǵyndarynyń biriniń arasynda janjal bolyp, arty tóbeleske ulasqan. Janjal barysynda qojalyq basshysy óziniń Lexus avtokóliginen áıeliniń atyna tirkelgen ańshy myltyǵyn alyp, qarsylasyna oq atqan.
Oqıǵa saldarynan aýyl turǵynynyń sol jaq janbasy men aıaǵy jaraqattanǵan. Oq 59 jastaǵy áıel men onyń kishkentaı nemeresin de jaraqattaǵan. Alaıda oq jaýdyrǵan kúdikti oqıǵa ornynan boı tasalaǵan.
«Adam óltirýge oqtalý faktisi boıynsha QK-niń 24-babynyń 3-bóliginiń, 99-babynyń 1-bóligine sáıkes sotqa deıingi tergep-tekserý bastaldy. Polısııa departamenti óńirdiń barlyq jeke quramyna baǵdar berdi. Tártip saqshylary kúdiktini ustap, ýaqytsha ustaý ızolıatoryna qamaýǵa aldy», dep túsindirdi BQO PD bastyǵy Arman Orazalıev.