Memleket basshysy Qasym-Jomart Toqaev Parlamenttiń VIII shaqyrylymdaǵy birinshi sessııasynyń ashylýynda bıyl elimizde alǵash ret 45 aýdan jáne oblystyq mańyzy bar qala ákimderiniń saılaýy ótetinin atap ótken bolatyn. Ákimderi saılanǵaly otyrǵan 45 óńirdiń 2-eýi Abaı oblysyna tıesili.
Osyǵan oraı ótken aptada Abaı oblysy máslıhatynyń kezekten tys jetinshi sessııasy ótti. Sessııa jumysyna Abaı oblysynyń ákimi Nurlan Uranhaev, Abaı oblystyq máslıhatynyń hatshysy Qýanysh Súleımenov jáne memlekettik mekemelerdiń basshylary men BAQ ókilderi qatysty.
Abaı oblysy máslıhatynyń sheshimimen pılottyq óńirler – Kýrchatov qalasy men Abaı aýdany ákimderiniń saılaýy 5 qarasha kúni ótedi dep bekitildi. Sessııa barysynda aıtylǵandaı, bul saılaý – Prezıdent tapsyrmasynyń oryndalýynyń aıqyn kórsetkishi, sondaı-aq el tarıhyndaǵy jergilikti aýdan (qala) ákimderiniń saılaý rásimderin ótkizýdegi alǵashqy tájirıbe bolyp sanalady.
Budan ózge sessııanyń kún tártibinde Abaı oblysynyń aýdan jáne oblystyq mańyzy bar qala ákimderin saılaýyn ótkizý boıynsha qanatqaqty óńirlerdiń tizbesin belgileý, Aıagóz aýdanynyń ákimshilik-aýmaqtyq qurylysyna ózgerister engizý, Abaı oblysy máslıhatynyń 2022 jyly 18 qarashadaǵy «Abaı oblysy boıynsha jer komıssııasy quramyn bekitý týraly» sheshimine (№10/63-VII) ózgerister engizý, Abaı oblysynyń qorshaǵan ortany qorǵaý jónindegi 2023-2025 jyldarǵa arnalǵan is-sharalar josparyn bekitý týraly máseleleri qaraldy.