Qyzylorda oblystyq tarıhı-ólketaný mýzeıi qorynda Abaıdyń tóteshe basylǵan óleńder jınaǵy bar.
San ǵasyr jádigerleri qattalǵan qazyna arasynan sırek kezdesetin kitaptar men qoljazbalar kolleksııasy tiziminde turǵan qundy dúnıe jaqynda ǵana mýzeıdiń ǵylymı hatshysy Ashat Saılaýdyń kózine túsip, el aldyna shyǵyp otyr.
Keıin belgili bolǵandaı, kitap mýzeı qoryna 1982 jyly ótkizilipti. Adamzat aqyl-oıynyń bıiginde turǵan Abaıdyń bul jınaǵyn mýzeıge jergilikti ardager muǵalim Myńata Qalybaev tapsyrǵan eken. Jıyrma úsh jyl ótkende restavrasııadan ótse de týyndyny indete izdegen eshkim bola qoımasa kerek. Ondaǵy shyǵarmalardy qoldanystaǵy qaripke túsirip otyrǵan jergilikti ólketanýshy Jumabaı Baızaqtyń aıtýynsha, kitap on úsh bólimnen turady. Onda aýdarmalarymen qosqanda 102 óleń men «Masǵut» poemasy toptastyrylǵan.
Áýelde baspa derekteri saqtalmaǵan kitap 1916 jyly jaryq kórdi degen boljam jasalǵan eken. Mýzeıde ótken shaǵyn basqosýǵa Almatydan onlaın qosylǵan belgili ǵalym, fılologııa ǵylymdarynyń kandıdaty, ál-Farabı atyndaǵy Qazaq ulttyq ýnıversıtetiniń oqytýshysy Serikbaı Qylyshbaı Abaı shyǵarmalarynyń kitap bolyp shyǵý tarıhyna toqtalyp, osy joldaǵy Alash azamattarynyń eńbekteri týraly aıtyp ótti.
«1916 jyly Orynborda jaryq kórgen jınaqta óleń az. Al myna kitap 1922 jyly Qazanda qazaqtyń jas aqyny Bernııaz Kúleevtiń jınaqtaýymen shyqqan bolýy múmkin», deıdi ǵalym.
Mýzeıde ótken basqosýda zııaly qaýym ókilderi qundy qazynany jurtshylyqqa keńirek tanystyrý baǵytynda usynys-pikirler aıtty.
Qyzylorda