Semeı qalasyndaǵy «Arbat» alańynda «Til – tutastyq týy» atty festıval ótti. Aýqymdy mádenı is-sharany Abaı oblystyq Mádenıet, tilderdi damytý jáne arhıv isi basqarmasy uıymdastyrdy.
Festıvaldyń qyzyqty ótýi kórermenderdi maqal-mátel, jańyltpash, ózge de tanymdyq oıyndarǵa arnaıy ortaǵa shaqyryp, qatystyrýymen erekshelendi. Sonymen qatar jergilikti qolóner sheberleriniń kórmesi de mádenı is-sharanyń ajaryn ashty.
«Til – tutastyq týy» festıvalindegi taǵy bir tamasha is Abaı oblysynda til saıasatyn damytýǵa belsendi úles qosyp júrgen ár aýdannan kelgen ustazdardyń, mádenıet salasy mamandarynyń marapattalǵany boldy. Abaı oblystyq Mádenıet, tilderdi damytý jáne arhıv isi basqarmasy basshysynyń mindetin atqarýshy Nazıra Tasbolatqyzy Besqaraǵaı aýdanyndaǵy N.Baımuratov atyndaǵy orta mekteptiń qazaq tili men ádebıeti pániniń muǵalimi Alfısa Shamsýtdınovany, Borodýlıha aýdany M.Áýezov atyndaǵy orta mektep muǵalimi Ásel Yqylasovany Ǵylym jáne joǵary bilim mınıstrliginiń Alǵyshatymen marapattasa, osy mınıstrliktiń Til saıasaty komıtetiniń Alǵyshatyn Pákistan Respýblıkasynyń azamaty, Shákárim ýnıversıteti fılologııa fakýltetiniń 2-kýrs stýdenti Ýsama Shahıd Mýhammadqa tabys etti.
«Til saıasaty komıtetiniń tarapynan Alǵyshat alýym – men úshin zor mártebe. Qazaq tilinde 70 paıyz shamasynda sóılep, jaza alamyn. Balalyq shaǵym 1998-2012 jyldary Qyrǵyzstanda ótip, sol elde 9-synyp bitirgen bolatynmyn. Biraq bizdiń el Qyrǵyzstan mektebiniń attestatymen qabyldamady da, biraz jyl qaıtadan oqýǵa týra keldi. Sóıtip, 2018 jyly mektepti sál keshigip bitirdim. Qazir jasym 26-da. Semeıge kelip, Shákárim ýnıversıtetine oqýǵa túsip, qazir ár aýdannan kelgen balalarmen tanysyp, kóbimen dostasyp kettim. Balalyq jáne jastyq shaǵym Ortalyq Azııada ótkendikten, keleshekte qazaq tilinen aýdarmashy bolyp jumys istemek oıym bar. Men Qazaqstandy jáne qazaq halqyn shyn júrekten jaqsy kóremin», deıdi Ýsama Shahıd.
Festıval aıasynda bir baıqaǵanymyz, jastardyń ónerge, sportqa, rýhanı-mádenı salaǵa qatysýǵa yntasy arta túsken. Sahna tórinde Abaı atyndaǵy teatr ártisteriniń somdaýymen Ahmet Baıtursynuly, Álıhan Bókeıhan jáne Mirjaqyp Dýlatulynyń qazaq eline, bolashaǵyna qatysty ózara oılaryn ortaǵa salyp, ultynyń taǵdyryna alańdaýshylyǵyn jetkizgen arnaıy qoıylym da kórermen júregine jol tapty.
Abaı oblysy