Memleket basshysy Joldaýda Úkimetke 2026 jylǵa qaraı IT qyzmetiniń eksportyn bir mıllıard dollarǵa jetkizýdi mindettedi. Bul – el ekonomıkasyn kóterýge jáne halyqtyń turmys sapasyn jaqsartýǵa baǵyttalǵan óte mańyzdy tapsyrma.
Biraq bul tapsyrmany tabysty oryndaýǵa júıeli jumys, keshendi jospar, daıyn qor kerek. Osy rette «Astana hab» halyqaralyq tehnologııalyq parkiniń róli óte joǵary. Qazirdiń ózinde bul tehnopark tirkelgen irili-usaq 1250 kompanııany akselerasııalaý, tehnologııalyq bıznes-ınkýbasııalaý, marketıngtik jáne ózge de is-sharalar ótkizý qyzmetterin kórsetip keledi. Onyń ishinde akselerasııalaý boıynsha – 558, bıznes-ınkýbasııalaý baǵdarlamasy boıynsha 544 startap jobasy tirkelgen. Qazir 50-den asa kompanııa IT eksport akselerasııalaý bıznes-baǵdarlamasy boıynsha qyzmetter alyp otyr.
«Astana habta» tirkelgen sheteldik kompanııalarǵa salyq jeńildikteri jáne sheteldiń azamattarǵa jeńildetilgen vızalyq rejimder qarastyrylǵan, tehnologııalyq kásipkerlikti tanymal etý jáne tehnologııalyq startap qurý baǵytyndaǵy IT-salasyndaǵy adamı kapıtaldy damytýǵa baǵyttalǵan 9 bilim berý baǵdarlamasy bar. 2022 jyly bir ǵana «Tech Orda» baǵdarlamasymen 2 myńnan astam stýdent bilimin jetildirdi. Osynyń bári IT qyzmetteriniń eksportyn arttyryp, otandyq IT-salasynyń áleýetin kóterýge septigin tıgizedi degenge senemiz.
Ońǵarbaı DÁNEBEKOV,
«Astana hab» halyqaralyq tehnologııalyq parki irikteý komıssııasynyń múshesi