Memleket basshysy Qasym-Jomart Toqaev otandyq bıznes ókilderimen kezdesti. Jıyn barysynda kásipkerlerdi alańdatqan ózekti máseleler kóterildi, dep habarlaıdy Egemen.kz Aqordanyń baspasóz qyzmetine silteme jasap.
«Búginde qylmystyq jáne azamattyq isterdiń nebári 5 paıyzy ǵana kassasııaǵa joldanady. Bul óte az jáne azamattardyń suranysyna sáıkes kelmeıdi. Sondyqtan zańgerler jáne kásipkerler qoǵamdastyǵymen óz aldyna bólek kassasııalyq ınstansııa qurý máselesi jóninde keńes ótkizý qajettigi pisip jetildi dep oılaımyn. Sýdıalar korpýsy bul qadam azamattardyń quqyqtaryn sapaly qorǵaýǵa múmkindik beredi dep sanaıdy.
Prezıdent ákimshiligi bul máseleni qolǵa alady. Kassasııalyq sotty qurý jóninde ortaq pikirge kelsek, sot júıesiniń bıýdjetin ulǵaıtýǵa jol bermeımiz. Bıznestiń zańdy múddesin saqtaý jáne qorǵaý – bul bizdiń basty mindetimiz», dedi Prezıdent.
Memleket basshysynyń aıtýynsha, ákimshilik ádiletti aıtarlyqtaı kúsheıtip, onyń qoldanys aıasyn keńeıtý qajet.
«Búginde sot sheshimderiniń 60 paıyzdan astamy azamattar men bıznestiń paıdasyna sheshiledi (buryn 15% paıyzdan kem bolǵan). Bul oń úrdis, áıtse de asyrasilteýshilikke jáne qubylýshylyqqa jol berýge bolmaıdy. Sonymen qatar memlekettik apparattyń bıznesti sotqa júginýge májbúr etetin kemshilikterdi túzetý jumystary tıisti deńgeıde júrgizilmeıdi», dedi Qasym-Jomart Kemeluly.
Prezıdent Úkimetke Joǵarǵy Sotpen jáne Ulttyq kásipkerler palatasymen birlesip, memlekettik organdar qyzmetindegi teris áreketterge muqııat taldaý jasaýǵa jáne olardy joıý úshin pármendi sharalar qabyldaýǵa tıis ekenin aıtty.
«Qaıtalap aıtamyn. Memlekettik apparattyń mindeti – elimizdegi zańdy kásipkerlik qyzmetke jan-jaqty kómek kórsetý. Zańdy buzyp, bızneske qandaı da bir kedergi jasaý – memlekettik sıpattaǵy qylmys. Men, Prezıdent retinde, Qazaqstandy bızneske, sonyń ishinde iri, orta jáne shaǵyn kásipkerlikke óte qolaıly jaǵdaı jasalǵan elge aınaldyrýdy óz mindetim dep sanaımyn», dedi el Prezıdenti.