On jyldyq belesin tabyspen támamdaǵan «Astana Opera» ujymy kúni keshe jańa maýsymynyń shymyldyǵyn túrdi. Ahmet Jubanov pen Latıf Hamıdıdiń áıgili «Abaı» operasymen ashylǵan teatrdyń jańa maýsymda da jańalyǵy mol. О́ner ordasynyń dırektory, Qazaqstannyń eńbek sińirgen qaıratkeri Ǵalym Ahmedıarov teatrdyń aldaǵy josparyn aıtty.
– «Astana Opera» elordamyzdaǵy jas teatrlardyń biri bolǵanyna qaramastan, óziniń baı da mazmundy repertýarymen qashan da kórermenine zor qýanysh syılap keledi On jyl boıy bas qalamyzdyń rýhanı-estetıkalyq kemeldenýine qyzmet etip kele jatqan ujym elimiz ǵana emes, álem boıynsha moıyndalǵan, tamasha talantymen tanylǵan tańǵajaıyp óner ordasy dep búginde maqtanyshpen aıta alamyz. Teatr repertýary álemdik klassıkalyq jaýharlarmen ǵana emes, ulttyq týyndylarmen de maýsym saıyn tolyǵyp, qazaq óneriniń kósegesin kógertýge bar kúsh-jigerimizdi arnap qyzmet etý ústindemiz. Bıyl da osy dástúrden tanbadyq. Teatrymyzdyń jańa maýsymynyń shymyldyǵy Muhtar Áýezovtiń lıbrettosyna jazylǵan A.Jubanov pen L.Hamıdıdiń áıgili «Abaı» operasymen túrildi. Tamasha týyndy Qazaqstannyń eńbek sińirgen ártisi, Memlekettik syılyqtyń laýreaty Alan Bóribaevtyń baıan etýinde «Astana Operanyń» jańa maýsymyna jańasha órnek syılaǵany sózsiz. 70 jyldan astam ýaqyt buryn qazaqstandyq klassıkalyq mýzyka danyshpandarynyń qalamynan shyqqan baǵaly týyndy elimizdiń jetekshi opera teatrynda jańa tynysqa ıe boldy. «Astana Operanyń» bas dırıjeri Alan Bóribaev sheksiz talanty men ulttyq klassıkaǵa, atap aıtqanda, óziniń naǵashy atasy A.Jubanovtyń shyǵarmalaryna degen erekshe qurmetiniń arqasynda «Abaı» operasyn elimizdiń mýzyka óneriniń boıtumaryna aınaldyrdy. 2018 jyly osy qoıylym úshin teatr Qazaqstan Respýblıkasynyń Memlekettik syılyǵymen marapattaldy. Táýelsiz Qazaqstannyń tól beınesine aınalǵan spektakl álemniń kóptegen elderinde qoıylyp, kórermen qaýymnyń ystyq yqylasyna bólendi. Ataqty «Abaı» jańa maýsymda da kórermen kózaıymyna aınalady dep senemiz.
– On jyl – teatr úshin úlken beles. Aıtýly belesti artqa tastaǵan ujymnyń jańa maýsymda kórermenine usynar qandaı jańalyǵy bar?
– Alǵashqy jyldary biz repertýarymyzdy klassıkalyq qoıylymdarmen tolyqtyrýǵa belsene kúsh saldyq, óıtkeni «Astana Opera» – klassıkalyq teatr. Desek te ulttyq repertýardy da nazardan tys qaldyrmadyq. Qazir, kerisinshe, repertýardy ulttyq spektakldermen baıytýǵa jumys isteýdemiz. О́zińiz de kórip kózaıym bolǵandaı, teatrymyzdyń ótken mereıtoılyq maýsymyn Ahmet Jubanov pen Ǵazıza Jubanovanyń «Qurmanǵazy» operasymen qorytyndylasaq, bıylǵy maýsymnyń ashylýy da qazaqstandyq kompozıtorlardyń týyndylaryn tirek etti. Aldaǵy maýsymdarda bul is tipti eselene túspek. Iаǵnı jańa maýsym da ulttyq repertýarmen jandanady. Alaıda mynany túsiný kerek: biz qoıylymdardy «qalypqa» salmaı, qazaq mýzyka mádenıetiniń altyn qoryna engen ulttyq týyndylarǵa óte muqııat qaraımyz jáne olardy álemdik deńgeıde basqa teatrlardyń jumysyn qaıtalamaıtyn biregeı kózqaras turǵysynan qoıamyz. Onyń aıqyn mysaly – áńgimemizdiń basynda sóz etken «Abaı» operasy. Jańa maýsymdy ulttyq klassıka týyndysymen asha otyryp, «Astana Opera» teatry elimizdiń baı mádenı baılyǵyn saqtaý men arttyrýdyń, otandyq avtorlar men oryndaýshylardy tanymal etýdiń mańyzdylyǵyn basa kórsetti dep esepteımin.
– Ǵalym Alǵıuly, Astanaǵa el óńirlerinen adamdar óte kóp keledi, olardyń keıbiri teatrǵa dress-kod saqtap qana kirýge bolady jáne bıletterdiń baǵasy asa qymbat degen oıda. Osy ras pa?
– Teatrdyń baǵa saıasaty barynsha ońtaıly desek bolady. Spektakl bıletteri qymbat emes, jazǵy demalystan keıingi kezeńde. Mysaly, qyrkúıek aıynda K.Baıseıitova atyndaǵy Kameralyq zaldaǵy konsertterge bıletter shamamen 3 myń teńge turady, sondaı-aq teatrymyzdyń Úlken zalynda ótetin spektaklderdiń baǵalary da ábden qoljetimdi. Dress-kodqa keler bolsaq, bul da qate pikir. Biz tilek bildirýshilerdiń bárin qýana qarsy alamyz. Árıne, eger adamdar ádemi kıinip kelse, quptaımyz, osy arqyly olar, eń aldymen, ózderine mereke syılaıdy ǵoı. Sondyqtan da teatrymyzdyń esigi ónerdi súıip, baǵalaıtyn kez kelgen kórermenge aıqara ashyq!
– Áńgimeńizge rahmet.
Áńgimelesken –
Nazerke JUMABAI,
«Egemen Qazaqstan»