Almatyda qala kúnine oraı «Charity Music Run» dep atalatyn mýzyka men sport festıvali ótti. Bul is-sharaǵa 1,5 myń adam qatysty. Olardyń arasynda egde tartqan qarııalar da, jas balalar da boldy. Tipti otbasymen birge kelip, jarys kórigin qyzdyrǵandardy da keziktirdik.
Bir aıta keterligi, festıvalden túsken qarajat qaıyrymdylyq is-sharalaryna jumsalady. Naqtylap aıtsaq, demeýshiler men qatysýshylar tarapynan bólingen qarjy Pedıatrııa jáne balalar hırýrgııasy ǵylymı ortalyǵynyń esepshotyna aýdaryldy. Atalǵan ortalyq sol qarajatqa qajetti qural-jabydyqtar men dári-dármekter satyp alady. Festıvaldiń basty demeýshisi – «Nurbank» ekenin de aıta ketken abzal. Basty maqsat – salamatty ómir saltyn ustanatyn azamattardyń basyn biriktirip, ıgi is-sharalardy júzege asyrý. Bul jerde jaqsy bı de boldy, tamasha ánder de shyrqaldy jáne jelaıaqtar jarys jolyna shyqty.
– Barlyq demeýshilerge myń alǵys. Ásirese aqparattyq qoldaý kórsetken áriptesterimizge sheksiz rızashylyǵymdy bildiremin. Bul – sport pen mýzykaǵa, qaıyrymdylyq pen janashyrlyqqa jany jaqyn, únemi kóterińki kóńil kúıde júretin jandardyń merekesi. Odan biz barynsha lázzat alýǵa tıispiz. Jáne de solaı boldy dep te oılaımyn. «Charity Music Run» festıvaliniń tusaýy 2018 jyly kesilgen edi. Sol kezden beri festıval kópshiliktiń kóńilinen shyqqan dástúrli sharaǵa aınaldy. Bıyl biz túsken qarjynyń barlyǵyn onkologııalyq aýrýǵa ushyraǵan balalardyń ıgiligine jumsaımyz, – dedi jobanyń jetekshisi ári basty uıymdastyrýshysy, «Nurbanktiń» aksıoneri Eldar Sársenov.
Bıyl «Charity Music Run» festıvaline «Nurbankten» bólek, «Gelıos», «Kusto Group», «Logıkom», «Vita Bottlers Qazaqstan», «Fransýz úıi», «Caspian Food», «Aqsaı», «G&G», «Dodo Pıssa» kompanııalary, «Azııa park», «Meloman», «Moll Aport» saýda ortalyqtary, «Chaplin Cinemas» kınoteatrlar jelisi jáne taǵy basqa uıymdar barynsha qoldaý kórsetti.
Festıvalge qatysýshylardyń biri 69 jastaǵy Tileýjan Qanapııanov: «10 shaqyrymdyq qashyqtyqty esh qınalmaı-aq 50 mınýtta júgirip óttim. Shyny kerek, bul jarysta bas júldeni oljalaýdy nemese jeke rekordymdy buzýdy kózdegen joqpyn. Bul rette bir ǵana maqsatym boldy. Ol – is-sharaǵa qatysý arqyly súıikti isimnen lázzat alyp, jastarmen dıdarlasý. Ol oıym oıdaǵydaı júzege asty. Sol úshin de uıymdastyrýshylarǵa alǵysymdy bildiremin. О́zim jeńil atletıkadan halyqaralyq dárejedegi sport sheberimin. Túrli qashyqtyqqa júgirýdi serik etkeli 50 jyldan asty. Sol aralyqta 500-deı medal men 50 tósbelgi ıelendim. Kezinde Máskeý Olımpıadasynyń kýási boldym. Shet memleketterde ótken dúbirli dodalarda 14 ret óner kórsettim. Jasyraq kezimde sýpermarafonǵa qatysyp, Almatydan Túrkistanǵa deıin 28 kún boıy júgirgenmin. Qazir 42 shaqyrymdyq marafonǵa daıyndalyp jatyrmyn», dedi.
Almaty