Ústel tennısinen 2024 jylǵy Azııa chempıonaty Almatyda ótedi. Bul aqparatty ATTU rastap otyr.
– Qazaqstan qaı sport túrinen bolsa da jarystardy asa joǵary deńgeıde ótkizedi. Solardyń qatarynda ústel tennısi de bar. Buıyrtsa, Azııa chempıonaty da sol dárejede uıymdastyrylady. Buǵan deıin bizdiń elde TMD men Ortalyq Azııa memleketteri arasyndaǵy doda jáne «World Tour Grand Finals» pen «Contender» serııasyndaǵy básekelerdiń jalaýy jelbiredi. Endi Azııa chempıonatyn ótkizýge bel býyp otyrmyz. Bul jarystar elimizde sporttyń osy túriniń damýyna tyń serpin beretinine senimdimin, – deıdi ústel tennısinen Respýblıalyq federasııanyń prezıdenti Danııar Abýlǵazın.
Esterińizge sala keteıik, kúni keshe ǵana aıaqtalǵan Azııa chempıonatynda el quramasy shırek fınalǵa deıin jetip, 2024 jyly shymyldyǵy túriletin álem chempıonatyna joldama aldy.