Qurlyqtyq hokkeı lıgasynyń (QHL) bıylǵy maýsymy bastalǵaly beri Astananyń «Barysy» qatarynan bes básekede jeńilis taýyp, óz jankúıerlerin jerge qaratqan edi.
Altynshy kezdesýdi jerlesterimiz Vladıvostoktyń «Admıralyna» qarsy ótkizdi. «Barys Arenadaǵy» básekede esepti 6 mınýtta Jozef Labeıt ashty – 1:0. Arada10 mınýt ótkennen soń qonaqtar tarazy basyn teńestirdi – 1:1. Úzilisten keıin Pavel Shen Qıyr Shyǵystan kelgen komandany alǵa shyǵardy – 1:2. Kózdi ashyp-jumǵansha Djeremı Brakko nysanany dál kózdedi – 2:2. Úshinshi kezeń bastalǵan bette «Admıral» qaıta alǵa shyqty – 2:3. Biraq «Barystyń» oıynshylary esh sasqan joq. 43 jáne 54-mınýttarda Roman Starchenko qatarynan eki márte mergendik tanytyp, elordalyq klýbqa jeńis syılady – 4:3. Bul – «Barystyń» chempıonattaǵy alǵashqy jeńisi.
Qazirgi kezde «Barys» bes upaıdy enshilep, túraqty birinshiliktiń jarys kestesinde 18-oryndy qanaǵat tutýda. Búgin jerlesterimiz óz alańynda Nıjnekamskiniń «Neftehımıgin» qabyldaıdy.