Serbııanyń astanasy – Belgradta kúres túrlerinen álem chempıonaty bastaldy. Bul jarysta túrli-tústi medaldardan bólek, 18 olımpıadalyq salmaq dárejesi boıynsha 90 joldama sarapqa salynady. Iаǵnı 2024 jyly Parıjde alaýy tutanatyn ǵalamdyq dodaǵa qatysýdy maqsat tutqan balýandar dál osy baıraqty básekede alǵashqy bestikten kórinýge tıis.
Jarysty erkin kúres sheberleri bastady. Alǵashqy kúni boz kilemge shyqqan tórt jerlesimizdiń úsheýi tusaýkeser kezdesýlerinde súrindi. 61 kılo salmaqtaǵy О́simjan Dastanbek amerıkalyq Vıtalıı Orýdjevten 0:10 esebimen utyldy. AQSh sportshysynyń ákesi de kezinde myqty balýan bolǵan. Tegi ázerbaıjandyq Výgar Orýdjev toqsanynshy jyldary KSRO, Belarýs jáne Reseı quramalary sapynda óner kórsetip, Barselona Olımpıadasynyń qola júldegeri jáne álemniń eki dúrkin chempıony atandy. Al Vıtalııdiń ózi Panamerıka birinshiliginiń eki dúrkin jeńimpazy. Desek te О́simjan úshin jarys áli aıaqtalǵan joq. Orýdjev fınalǵa shyqqanynyń arqasynda ol jubanysh beldesýlerde baq synaý múmkindigine ıe boldy.
70 kılo salmaqtaǵy Sanjar Dosjanovtyń jastar arasyndaǵy Eýropa chempıony, Iаshar Doǵý memorıalynyń jeńimpazy, ázerbaıjandyq Magomed-Bashır Hanıevke áli jetpedi. Bul báseke 2:9 esebimen aıaqtaldy. 125 kılo salmaq dárejesinde kúsh synasqan Iýsýp Batyrmurzaev Amerıkanyń alyby, jastar arasyndaǵy álem chempıony Meıson Perrıstiń temir qursaýynan qutyla almaı, tas-talqan bolyp jeńildi – 0:10.
Jarystyń alǵashqy kúni qazaq jankúıerlerin Azamat Dáýletbekov qana qýantty. 86 kılo salmaqta aıqasqan ol bastapqy básekede lıtvalyq Domantas Pavlıýchenkony 9:0 esebimen oısyrata utsa, kelesi kezeńde jasóspirimder men jastar arasyndaǵy qurlyq chempıony, álem birinshiliginiń kúmis júldegeri, Ivan Iаrygın kýboginiń ıegeri, reseılik Arslan Bagaevti qos jaýrynymen jerge qadady. Shırek fınalda Fransııanyń týy astynda óner kórsetip júrgen jastardyń Eýropa chempıonatynyń eki dúrkin jeńimpazy, cheshenstandyq Raqym Magamadovqa soqyr upaı da ustataı, aıqyn basymdyqpen jeńdi – 10:0. Jartylaı fınalda Dáýletbekov AQSh-tyń ataqty balýany, Olımpıada men álemniń eki dúrkin chempıony Devıd Teılorǵa jol berdi. Endi qazaq balýany qola medal úshin talasady.
Keshe atalǵan salmaq dárejeleri boıynsha altyn jáne qola medal úshin beldesýler ótti. Bas júlde úshin myna balýandar kúsh synasty: 61 kılo – Vıtalıı Orýdjev (AQSh) pen Abasgadjı Magomedov (Reseı), 70 kılo – Ámır Iаzdanı (Iran) men Zeın Rezerford (AQSh),
86 kılo – Hasan Iаzdanı (Iran) men Devıd Teılor (AQSh) jáne +125 kılo – Ámır Zare (Iran) men Geno Petrıashvılı (Grýzııa).