El ishinde aldynan jumys úrkip turatyn, aq adal eńbeginiń arqasynda ujymynyń shynaıy qurmetine bólenip júrgen jastardy kórgende janyń súısinetini bar. Sondaı talapty jastyń biri Mıras Erkenov Makınsk qalasyndaǵy jylý oqshaýlaý zaýytynda aýysym sheberi bolyp eńbek etedi.
Áli otyzǵa tolmaǵan jas jigit jumysty berilip isteýimen ózge áriptesterine úlgi-ónege bolyp júr. Bulandy aýylynda orta mektepti bitirgennen keıin aldynan mamandyq tańdaý týraly másele shyqty. О́z aıtýyna qaraǵanda, Mıras Aqyljanuly kóp oılanbapty. Astana qalasyndaǵy temirjolshylar kolledjine oqýǵa túsken. Tehnık qurylysshy mamandyǵyn ıgergen. Áskerı boryshyn ótep kelgennen keıin úsh jyldaı saýda menedjeri bolyp qyzmet etken. Áıtse de kóńildiń qalaýy áýel basta ózi qulaı súıgen tylsym syry mol tehnıka álemine aýyssa kerek. Osylaısha, ózi týǵan ólkedegi bolashaǵynan úlken úmit kúttiretin jylý oqshaýlaý zaýytyna ornalasqan.
Buryn sál buıyǵy kún keshken Makınsk qalasynyń áleýmettik-ekonomıkalyq damýyna táp-táýir úles qosa bastaǵan zaýyt jylý ustaǵyshtar shyǵarady. Orta Azııada teńdesi joq alyp kásiporyndy salýǵa jalpy quny 8 mlrd teńge jumsalǵan. 200-ge jýyq adamdy turaqty jumys ornymen qamtamasyz etken zaýyt el ishindegi jumyssyzdyqty azaıtýǵa da yqpalyn tıgizip keledi.
– Bazalt tasy – mıneraldyq maqtanyń shıkizaty. Kásiporyn 100 paıyz otandyq ónim shyǵarady. Zaýytta ónimdiligi joǵary ıtalıandyq qondyrǵylar ornatylǵan. Domna peshinde 1 600 gradýsqa deıingi joǵary temperatýrada bazalt tasy eritilip, keıin arnaıy qosyndylar arqyly ónim daıyndalady. Aldymen shıkizat býnkerge toltyrylady. Sosyn eritkish peshten ótkizip, oǵan jelim, ylǵal ótkizbeıtin materıaldar sııaqty qosyndylardy aralastyrylady. Qalyńdyǵy men tyǵyzdyǵyn qajettiligine oraı belgilep, arnaıy qondyrǵylardyń kómegimen mıneraldy maqta daıyndalady, – deıdi Mıras Aqyljanuly.
Qurylysy qarqyndy damyp jatqan elorda birer jyl buryn jylý saqtaǵysh materıaldardy Reseıden tasymaldap kelgen. Endi qurylysqa qajetti zat irgedegi Bulandyda daıyndalady.
Mıras Aqyljanuly jumys barysynda tehnologııalyq úderisterdiń múltiksiz oryndalýyn qadaǵalaıdy. Tehnıkalyq qyzmetkerlerge jetekshilik etedi. Ári jumys ornynda aıtyp kelmes apattan saqtandyrý úshin tehnıkalyq qaýipsizdik jaıly árbir jumysshyǵa jetkizip, jumys barysynda talaptyń oryndalýyn baqylaıdy. Sehtyń qujattaryn toltyrýmen de aınalysady.
– Shyǵarǵan ónimimizdiń talapqa saı bolýyn qatań qadaǵalaımyn, – deıdi sheber. – Otandyq jylý ustaǵysh materıalǵa degen suranys kóp. Qyrǵyzstan, Tájikstan, О́zbekstannan bólek el ishindegi qurylysqa da kóptep paıdalanýda. Azamattyq jáne ónerkásiptik qurylysta jylytý jáne dybysty oqshaýlaý úshin qajetti materıaldardyń ózimizde shyǵarylýy – atap aıtarlyq-aq dúnıe.
Áriptesteriniń aıtýyna qaraǵanda, Mıras Aqyljanuly – boıyna iskerlik qasıetterdi molynan jınaǵan, tyndyrymdy jan. Osy ilkimdilikti jumysty uıymdastyrý barysynda durys paıdalana biledi. Jastyq jigeri jalyn atqan sheber ortaq iske áriptesterin jumyldyryp, ózderi atqaryp jatqan tynymsyz eńbektiń nátıjeli bolýyn qalaıdy. Árqashan ózine tapsyrylǵan iske joǵary jaýapkershilikpen qaraıtyn ol ózgeden de sony talap ete biledi.
– Qazirgi kúni óndiriste qazaq jastaryn kóp kóre qoımaısyń. Negizi jastardyń oqyp, bilim alýyna, kásip ıgerýine memleket tarapynan qanshama jaǵdaı týǵyzylyp otyr. Demek, ózderine senim artylǵannan keıin jastar da tehnıkalyq mamandyqty ıgerip, jumys istegeni jón ǵoı, – deıdi keıipkerimiz.
Aqmola oblysy,
Bulandy aýdany