Abaı oblysynyń Besqaraǵaı aýdanyna qarasty Jetijar aýylynyń turǵyny sibir jarasy dertine shaldyqqan degen kúdikke ilindi. Osyǵan baılanysty búgin tańerteńnen aýyldyń kireberisine blok-post qoıylyp, tótenshe jaǵdaı jarııalandy. Ázirge Abaı oblystyq TJB turǵyn týraly naqty málimet jarııalaǵan joq, dep habarlaıdy Egemen.kz.
Degenmen, Abaı oblysy ákimdiginiń habarlaýynsha, naýqas PTR testinen ótken, aýrý belgisi rastalmaǵan. Tótenshe jaǵdaıdyń aldyn alý jáne joıý jónindegi jospardan tys ótkizilgen oblystyq komıssııa otyrysynda qabyldanǵan sheshimge sáıkes, halyqtyń qaýipsizdigin qamtamasyz etý úshin jergilikti deńgeıde tótenshe jaǵdaı engizilgen. Sol maqsatta qazir Jetijardan aýylsharýashylyǵy ónimderin shyǵarýǵa shekteý qoıý sharasy kúshine enip, jaǵdaıdyń sebepterin anyqtaý jumystary júrip jatyr. Mamandardyń aıtýynsha, sibir jarasy aýrý maldyń etinen, terisinen, júninen, tipti, lastanǵan taǵamdardan, aýyzsýdan da juǵady.
Besqaraǵaı aýdanynyń basshylyǵy tek resmı aqparatqa ǵana senýge shaqyryp otyr. Sebebi, álden el ishinde dúrbeleń týǵyzatyn qaýeset, jalǵan aqparattar áleýmettik jelilerde tarap jatyr. Sondyqtan da jaǵdaı tikeleı baqylaýda bolǵandyqtan, halyqtyń rastalǵan aqparatqa ǵana sengeni jón.