Májilis depýtaty Ermurat Bapı Premer-mınıstr Álıhan Smaıylov pen Bas prokýror Berik Asylovtyń atyna joldaǵan depýtattyq saýalynda keńshar turǵyndarynyń paıǵa berilýi tıis jerden úles ala almaı júrgenin qozǵady, dep habarlaıdy Egemen.kz.
«Ádiletti Qazaqstan qurý jónindegi Prezıdent Q.Toqaevtyń bastamasy kún ótken saıyn sıyrquıymshaqtanyp barady. Buǵan birinshi kezekte tıisti memlekettik organdardyń salǵyrttyǵy men jaýapsyzdyǵy kináli dep oılaımyn. Almaty oblysy Qarasaı aýdanyna qarasty Kamenskıı mal tuqymyn asyldandyrý zaýytynyń jerin jekeshelendirý máselelerinde oryn alǵan qylmystyq zańsyzdyqtardy bas prokýrordyń atyna saýal joldaý arqyly jetkizgen edim. Meniń bul saýalyma jaltarma jaýap keldi. B.Asylov myrza, prokýrorlyq komıssııa sizdi bas prokýror basyńyzben kópe-kórneý aldaǵan, álde Qarasaı aýdanynyń prokýrory eski Qazaqstannyń múddesin qorǵap, jekeshelendirý týraly zańdy sizge naqaq burmalap kórsetken. Máselen, siz óz jaýabyńyzda «zaýyttyń jeri jekeshelendirýge jatpaıdy. Ol jer memlekettiń arendalyq jeri» dep jazǵan ekensiz. Esińizge salaıyn, 1990 jyldary Qazaqstanda jekeshelendirilgen barlyq sovhozdar men kolhozdar tegisteı memlekettiń jerin ıelenip otyrǵan. Keńestik kezden muraǵa qalǵan tártip boıynsha barlyq jer memlekettiń jeri bolǵan. 1991 jylǵy 22 maýsymda qabyldanǵan jekeshelendirý zańy boıynsha eldegi barlyq aýyl sharýashylyq mekemeleri memlekettiń jeri men múlkin jekeshelendirdi. Kolhoz-sovhozdardyń eńbekshilerine sol memlekettiń jeri paıǵa bólinip berildi. Marstan biz jer ákelgemiz joq, bári memlekettiki bolatyn. Endi kelip siz maǵan Kamenskıı sovhozy memlekettiń jerinde otyrǵandyqtan ol sovhozdyń jeri jekeshelendirýge jatpaıdy dep qulaqqa syımaıtyn ýáj aıtasyz. Osy zańsyzdyq qalaı oryn aldy? Kamenskıı sovhozy 2002 jyly eńbek ujymynyń jınalysynda sharýashylyqty jekeshelendirý týraly sheshim shyǵarǵan. Biraq barlyq aýdandyq, oblystyq múddeli mekemeler qoldaǵan bul sheshimdi sol kezdegi aýylsharýashylyǵy mınıstri Ahmetjan Esimov óz buıryǵymen buzǵan. Onyń buıryq ýájinde Kamenskııdiń jeri memlekettiń jeri sondyqtan sovhoz jekeshelendirýge jatpaıdy dep búkil Qazaqstanǵa ortaq jekeshelendirý zańyn belden biraq syzǵan. A.Esimov myrza óz múddelerine jekeshelendirý úshin Qarasaı aýdanaralyq ekonomıkalyq soty arqyly Kamensıı sovhozyn bankrot etip jarııalap, ony eks-premer Sergeı Tereshenko basqarǵan «Soıýztehservıs» seriktestiginiń ıeligine berýge múmkindik jasaǵan. Biraq sol ekonomıkalyq sotqa paı alatyn sovhozdyń birde-bir adamy shaqyrylmaǵan. Eger sovhozdyń sol jeri memlekettiń jeri bolsa, «Soıýztehservıs» keıin bul jerdi qurylys kompanııalaryna qalaı satty? Bul aferanyń barlyq qujattary sovhoz eńbekshileri jaldaǵan zańgerlerde jáne mende saqtaýly tur. Keıinnen bul qylmystyq zańsyzdyqtyń izin jasyrý jáne túpnusqasyn qurtý úshin múddeli qylmystyq top Qarasaı aýdanynyń arhıvin bir emes, eki ret órtep jibergen. Arada bir jyl ótkende Esimov myrzanyń sybaılasy Tereshenko satýdan qalǵan 274 gektar jerin kepildikke qoıyp, 1 mıllıard dollarǵa jýyq qarjyny bankten sypyryp alǵan. Al keıinnen bank óz aqshasyn qaıtarý úshin problemalyq aktıvter qory arqyly 274 gektar jerdi aýksıon arqyly satqan. Biraq oǵan paıshylar taǵy da qatystyrylmady», dedi E.Bapı.
Májilis depýtaty keńshar paıshylarynyń quqyǵyn qorǵaǵan advokat Kamenskıı sovhozy eńbekshileri kooperatıviniń tóraǵasy qylmystyq toptyń yqpalymen zańsyz, naqaq jalamen sottalǵanyn da alǵa tartty. Zańsyz shyǵarylǵan aktıvterdi elge qaıtarý máselesine oralǵan paıshylardan tartyp alynǵan jer zańsyz shyǵarylǵan aktıvterdi qaıtarý zań aıasyna saıatynyn jetkizdi. Májilis depýtaty Bas prokýrordyń atyna joldaǵan depýtattyq saýalynda shetelge zańsyz shyǵarylǵan avtıvterdi elge qaıtarýmen aınalysýy tıis komıtet úsh aıdan beri qurylmaǵanyn synǵa aldy. Eldegi áleýmettik ádilettilikti qalyptastyrýǵa múddelilik tanytqan Prezıdent Q.Toqaevtyń komıtetti qurý jóninde aıtqan bir jarym aı burynǵy ókimi nege oryndalmaı jatqanyn da surady.