Túrkistan oblysyna qarasty Otyrar aýdanynda óndiriletin shubat ulttyq sýsyny búginde búkil Qazaqstan naryǵyn qamtyp otyr. Ulttyq brendimizdiń baǵasy qoljetimdi, sapasy joǵary, dep jazady Egemen.kz.
«Otyrar-Sút-Et» aýylsharýashylyq óndiristik kooperatıvi jergilikti balabaqshalar men mektepterdiń balalaryn bir mezgil sút ónimderimen qamtamasyz etip keledi.
Túrkistan oblysy ákiminiń baspasóz qyzmeti habarlaǵandaı, qazirgi tańda sharýashylyq kúnine 5000 lıtr túıe sútin óndiredi eken. Munda qazir barlyǵy 12 adam jumyspen qamtylǵan. Saqtalý merzimine qaraı Astana men Almaty qalalaryna jóneltiledi. Tutynýshylardyń kóbi - jergilikti turǵyndar.
«Kooperatıv óz ónimin súttiń maılylyǵyn saqtaı otyryp daıyndaıdy. Shubattyń saqtalý merzimi uzaq emes. Endi ujym jańa ınnovasııa jelisimen untaqtalǵan shubat óndirýdi josparlap otyr. Túıe súti aǵzaǵa óte paıdaly bolǵandyqtan, ónimniń bul túrine suranys joǵary», deıdi kásiporyn tóraǵasy Nursultan Ahaev.