О́rt sóndirýshi álemdegi eń qıyn mamandyqtardyń biri. Bul salada qyzmet etý úshin úlken júrek kerek. Tilsiz jaý salǵyrttyqty keshirmeıdi. Oqys jaǵdaı kezinde jyldam sheshim qabyldap, tabandylyq tanytý mańyzdy. Osyndaı jaýapkershiligi mol jumysty atqaryp júrgen órt sóndirýshiniń biri Nazymhan Tursynmen tildesken edik.
Nazymhan Tursyn – Astana qalasy Tótenshe jaǵdaılar departamenti órt sóndirý jáne avarııalyq-qutqarý jumystary qyzmeti № 5 mamandandyrylǵan órt sóndirý bólimi basshysynyń orynbasary. Ol munda 2020 jyldan beri qyzmet etip keledi. Bul bólim tek órt sóndirý jumystarymen ǵana emes, sondaı-aq avarııalyq-qutqarý qyzmetimen de aınalysady. Qala boıynsha shaqyrtý kóp túsetin mekeme de osy jer. О́rt sóndirýshiniń aıtýynsha, bir kúnde on shaqty shaqyrtýǵa deıin túsýi múmkin. Dabyl qaǵylǵan sátte olar bir mınýt ishinde jınalyp, tótenshe jaǵdaı ornyna on mınýt aralyǵynda jetedi.
Otan úshin otqa túsip júrgen keıipkerimizdiń bul mamandyqqa degen ańsary bala kúninen-aq aýǵan. Aǵa-býynnyń izinen erip, ókshe basyp kele jatqan ol mamandyǵyn adaspaı taýypty. Kókshetaý tehnıkalyq ınstıtýtynda arnaıy bilim alyp, qazir eńbeginiń nanyn jep júr. О́zi bul salada tek mamandyǵyn sheksiz jaqsy kóretin tańdaýyna adal qyzmetkerler jumys isteıtinin aıtady.
«О́rt sóndirýshige eń áýeli jaýapkershilik qajet. Biz ólim men ómirdiń arasynda turǵan adamdar úshin jaýaptymyz. Bul salaǵa adamdarǵa jaqsylyq jasaımyn degender ǵana keledi. Mundaǵylar adal eńbektiń abyroıǵa bóleıtinin jaqsy biledi. Sondaı-aq jyldam ári sýyqqandy sheshim qabyldaý mańyzdy. О́rt sóndirý – ujymdyq jumys. Ottyń arasynda júrgende birligimiz bekem», deıdi ol.
Bul mamandyq ıeleri fızıkalyq, psıhologııalyq daıarlyq oqýlaryn oqyp turady. Jalpy jumys kúni temirdeı tártipke baılanǵan. Kún tártibi tańǵy taralymnan bastalady. Otyz mınýt ishinde aýysym qyzmetkerleriniń tólqujattary, syrtqy kıimi, jalpy usqyny men avtomobılderge arnalǵan ruqsattama qaǵazy tekseriledi. Budan ári eńbek adamdarynan qyzmettik mindettemelerin bilýi boıynsha suraqtar qoıylady. О́tken táýlikte atqarylǵan jumystar jóninde bólim basshysyna baıandama jasalady. Tańǵy taralymnan soń aýysym kezekshiligi júrgiziledi. Aýysym kezekshiligine otyz mınýt ýaqyt beriledi. О́rt sóndirý avtomobıliniń júrgizýshileri órt sóndirý tehnıkalaryn qabyldasa, órt sóndirýshi qajet qural-jabdyqtardy qabyldaıdy. Bul rette kóliktiń jalpy jumys isteýi, sýdyń bar-joǵy, órt sóndirgish kóbiktiń deńgeıi muqııat tekseriledi. Nazymhan Tursynnyń aıtýynsha, ózi qyzmet etip júrgen bólimniń tehnıkalyq jabdyqtary men órt sóndirý avtomobılderi túgel jańa. Mekeme 2020-2021 jylǵy tehnıkalarmen jabdyqtalǵan eken. Arasynda 2012-2015 jylǵy tehnıkalardyń da baryn jasyrmady.
Sóz sońynda órt sóndirýshi jigit ár órt jaǵdaıy jadynda saqtaýly ekenin aıtty. О́zgeniń ómiri úshin otqa túsýden taıynbaıtyn olardyń jumysy – naǵyz erlik. Búginginiń batyryna aınalǵan eńbek adamdarynyń mereıi laıym ústem bolýǵa tıis.