Áıelder arasyndaǵy Qazaqstannyń ekinshi, álemniń 81-raketkasy Iýlııa Pýtınseva Qytaıdyń Gýanchjoý qalasynda WTA 250 týrnıriniń fınalyna shyǵa almady.
Bas júlde úshin ótetin oıynǵa joldama beretin básekede jerlesimiz osy jarystyń 1-raketkasy retinde tirkelgen álemdik reıtıngte 27-orynda turǵan Polsha ókili Magda Lınettpen sheberlik baıqasty. Nebári 1 saǵat 16 mınýtqa sozylǵan matchta polshalyq tennısshi jerlesimizdi eki sette 6:2, 6:3 esebimen qapy qaldyrdy. Báseke barysynda Magda Lınett 3 eıs jasap, 6 breık-poınttyń teń jartysyn paıdalana bilse, Pýtınseva úsh breık-poınttyń barlyǵyn múlt jiberdi.
Eki tennısshi bıyl sáýir aıynda elordada ótken Bıllı Djın Kıng týrnıriniń irikteý kezeńinde kezdesip, Iýlııa eki sette 7:5, 6:3 esebimen basym túsken edi.