Túrkistan oblysynyń sharýalary tropıkalyq jemis aǵashtaryn jersindirgen. Saryaǵashtaǵy jylyjaıda banan men papaııa jáne ózge de tropıkalyq óskinder jaıqalyp óse bastaǵan. Bul týraly «Habar» telearnasynda ótken 4 saǵattyq «Adal eńbek» telemarafonynda kórsetildi, dep jazady Egemen.kz.
Tropıkalyq aımaq klımatyna beıimdelgen jemisterdi Qazaqstannyń topyraǵyna jersindirýmen aınalysatyn 63 jastaǵy Tursyn Tasqojanyń 12 sotyq tájirıbe alańynda banan men papaııadan bólek, qulpynaıdyń jańa tuqymy, kıvı, záıtún, lımon men mandarın aǵashy jaıqalyp tur. Al jylyjaı topyraǵy esh qospasyz tabıǵı dárýmendermen tyńaıtylady. Osyndaı erekshe kútimniń arqasynda banan aǵashy bir jylda tamyr baılap, 4 metrge deıin boılaǵan. Qazir ár 1,5 aıda 25 keliden asa ónim beredi eken.
Sıtrýstyq jemister men jıdekterge naryqta suranys joǵary ekeni belgili. Sondyqtan agronomdar tropıkalyq beldeýde ósetin óskinderdi kóbeıtip, qulpynaıdyń jańa tuqymyn jappaı egistikke ázirlep jatyr. Basty maqsat - ımportty ysyryp, saýda sórelerin otandyq tabıǵı taza ónimmen qamtý. Ol úshin sharýa kóshetterdi kóbeıtip, ózge sharýashylyqtarmen de bólisýge daıyn eken.
Baǵbandardyń sózinshe, elimizge jyl saıyn ózge memleketterden 150 myń tonnadan astam sıtrýs jemisteri jetkiziledi, atalǵan oblystyń agrarly aımaǵynda egistikti ártaraptandyryp, táýeldilikti azaıtýǵa bolady eken, ol úshin aýdandaǵy 760 gektar jylyjaı keshenin damytýǵa ekpin berip, memlekettik qoldaý sharalaryn kúsheıtý qajet.