Bul týraly elordanyń kommýnıkasııalar qyzmetinde ótken brıfıngte Astana ákiminiń orynbasary Eset Baıken habarlady, dep jazady Egemen.kz qala ákimdiginń baspasóz qyzmetine silteme jasap.
Elordada jyl saıyn mektep jasyna deıingi balalar sany artyp keledi. Oǵan týý kórsetkishi jáne kóshi-qon prosesine oń áser etip otyr. Osyǵan baılanysty elorda balabaqshalarynda ornalastyrylatyn memlekettik tapsyrys ta artyp keledi. Bıyl ol tórt eseden astam ósti.
Eset Baıkenniń aıtýynsha, búgingi tańda Astanada 66 164 balany qamtıtyn 525 mektepke deıingi uıym jumys isteıdi, onyń 100-i – memlekettik, 424-i – jekemenshik, úsheýi – vedomstvolyq. 2023 jyly eki jastan bastap mektep jasyna deıingi balalar sanynyń ósýine baılanysty balabaqshalarda qajetti oryndar sany 26 563-ti qurady.
«Qazirgi kezeńde INDIGO elektrondyq portalynda kezekke 60 971 mektepke deıingi jastaǵy bala tirkelgen, onyń ishinde 2 jastan 6 jasqa deıin – 41 818 bala. Qala ákimdigi bıyl balalardy mektepke deıingi tárbıemen jáne oqytýmen qamtýdy ulǵaıtý maqsatynda 224 jekemenshik mektepke deıingi uıymda 10 317 orynǵa arnalǵan memlekettik bilim berý tapsyrysyn ornalastyrdy», dep túsindirdi Eset Baıken.
Aıta ketsek, bıyl qalanyń mektepke deıingi mekemelerinde memlekettik tapsyrys ótken jylmen salystyrǵanda tórt eseden astam ósti. Bul deńgeı jyl saıyn saqtalady.
Budan bólek, jeke ınvestısııalar esebinen 17 balabaqsha qurylysy júrgizilip jatyr, sondaı-aq bıýdjettik-ınvestısııalyq jobalar esebinen 60 memlekettik balabaqshany jobalaý bastaldy.
Sonymen qatar bıyl qyrkúıek aıynan bastap elordadaǵy 4 balabaqshada (№ 54, № 60, № 66, № 95) jáne 4 shaǵyn ortalyqta (№ 8, № 11, № 30, № 76) emosıonaldyq-eriktik jáne minez-qulyq buzylystary bar (aýtızm) balalarǵa arnalǵan ınklıýzııany qoldaý kabınetteri ashyldy.