Altyn medal armanǵa aınaldy

Aslanbek erlershe aıqasty

Aslanbek chempıonattyń basynan kúrdeli jekpe-jekterge tap boldy. Mysaly, alǵashqy kezdesýinde qytaılyq Peıchen Vandy qansha sabasa da tóreshiler nokdaýn tirkemeı, jergilikti boksshyǵa búıregi burǵa­ny kórinip turdy. Soǵan qaramastan, úsh raýnd boıy belsendilik tanytqan Aslanbek sheberligin dáleldep, kelesi aınalymǵa ótti. A.Mýsohodjaevpen ótken shırek fınalda da tóreshilerdiń otandasymyzǵa búıregi bura qoımaǵany baıqalyp turdy.

Boksshylar qansha lısenzııa alady?

Jeksenbi kúni kúndizgi sessııada judyryqtasqan 92 kılo salmaqtaǵy Saǵyndyq Toǵambaıǵa «kóz tıdi». Endi ol – Azııa oıyndarynyń qola júl­degeri. Jartylaı fınalda Hýeshen Hanmen ótken jekpe-jek ekeýiniń ka­rerasyndaǵy eń aýyr kezdesý desek, qatelespegen bolar edik. Bir-birine jumsaǵan soqqylarynan adam shatasady. Áıtkenmen boksshylar jekpe-jekti sońyna deıin jetkizdi. Nátıjesinde, barlyq tóreshi qytaılyq sportshyǵa 5:0 esebimen (29:28) jeńisti ustatty. Saǵyndyq jartylaı fınalǵa deıin ırandyq Týfan Sharıfıdti 47 sekýndta nokaýtqa túsirse, alǵashqy jek­pe-jeginde Mońǵolııa ókili Barıahaan Dorjdy eki márte nokdaýnǵa jiberip, jarysty merziminen buryn aıaqtaǵan-dy.

Mahmud Sabyrhan Azııa oıyn­da­ryndaǵy ekinshi jekpe-jeginde jeńi­lis tapty. 57 kılo salmaq dárejesi­­niń 1/8 fınalynda soltústikkoreıalyq ­­O Tae­bommen kezdesý 2:3 ese­bimen ­ko­reıa­lyq sportshynyń paıdasyna she­shildi. Bizdiń boksshy birinshi aına­lymda Oń­tústik Koreıa ókili Lı Ien Chan­men ju­dyryqtasyp, aıqyn basymdyq­pen je­ńiske jetken edi.

Nurbek Oralbaı (80 kg) Qytaı na­my­­syn qorǵaǵan etnıkalyq qazaq Toqtarbek Tańathanǵa qarsy jekpe-jek ót­kizdi. Kezdesý 3:2 esebimen Qytaı óki­liniń jeńisimen aıaqtaldy. Qazaqstan boks­shysy qarsylasyn ekinshi raýndta nok­daýnǵa jibergenine qaramastan, tóre­shi­ler jeńisti Toqtarbek Tańathanǵa berdi.

Bir qyzyǵy, IBA ótkizgen kez kelgen jarysty, tipti álem chempıonatynyń nátıjesin Olımpıadalyq komıtet moıyndamaıdy eken. Áıtpese Nur­bek pen Toqtarbek bıyl Tashkentte ótken álem chempıonatynyń fınalynda judy­ryq­tasqan bolatyn. Eki myqtyny eki sebetke túsirip, tek fınalda kezde­setindeı etý kerek edi. 63,5 kılo salmaqta О́zbekstan atynan shyǵatyn qandasymyz Rýslan Abdýllaevtyń basynda da týra osyndaı jaǵdaı. О́kinishke qaraı, ol bul jekpe-jekke daıyn bolmaı, mońǵolııalyq boksshyǵa ese jiberdi.

Asa aýyr salmaqtaǵy Qamshybek Qońqabaev Bahreın atynan óner kórsetip júrgen Reseıdiń burynǵy sportshysy Danıs Latypovpen judyryqtasyp, ony 5:0 esebimen jeńdi. Alaıda úshinshi raýndta Qamshybek oılamaǵan jerden nokdaýn alyp qaldy. Jartylaı fınalǵa ótken ol fınalǵa beriler joldama úshin úndistandyq Narendermen judyryqtasady. Al ekinshi jartylaı fınaldyq jekpe-jek Qytaıda týyp-ósken qandasymyz Danabek Baıkenje men ózbek Bahodır Jalolov arasynda ótedi. Aıta keteıik, Danabek shırek fınalda Mońǵolııanyń atynan shyqqan taǵy bir qazaq boksshysy Beknur Qalıdi ýaqytynan buryn jeńgen-di.

Boksshylardyń jeńisteri men jeńi­listerine qatysty quramanyń bas bapkeri Myr­zaǵalı Aıtjanov pikir bildirdi.

– Alǵashqy eki raýndta Aslanbek jeńip tursa da, tóreshiler basym daýysty qarsylasqa berdi. Ony kórip turmyz. Úshinshi raýnd bastalarda oǵan: «Nokaýtpen jeńip shyqpasań, bolmaıdy», dedim. Aıtqanym aıdaı keldi. Aslanbek úsh ret nokdaýnǵa jiberip, jeńisti julyp aldy. Mahmudta da osyndaı jaǵdaı. Bul jarysta shaǵym múldem berilmeıdi. Sondaı erejesi bar. Jekpe-jekke qatysty aıtsaq, bul – Mahmut úshin jańa salmaq, qarsylastary da myqty. Ony da eskerýimiz kerek. Baryn saldy. Biraq jeńildi dep aıta almaımyz. Nurbektiń qarsylasy óte myqty. Ekeýi bıyl Prezıdent kýboginde, álem chempıonatynyń fınalynda kezdesken. Bul – boks. Birde jeńip, birde jeńilesiń. Sol sebepti bireýdi kinálamaımyz. Tek ózimiz bir bas joǵary bolýymyz kerek. Meniń ustanymym sondaı. Eshkimge renjimeı, shákirtterimizdi tyńǵylyqty daıyndaýymyz kerek. Saǵyndyqqa eshqandaı ókpe joq. Baryn saldy. Qytaılyq boks­shy da myqty eken. Ekeýi de qanshama soqqyǵa tótep berdi. Saǵyndyqqa úlken senim artylǵan edi, sol senimdi aqtamady. Jeńilgendi mo­ıyndaý kerek. Qamshybekke osyndaı kezdesýler kerek. Árdaıym birinshi jekpe-jek ońaı bolmaıdy. Latypov ta – qurlyqtaǵy myqtylardyń biri. Qar­sy­lasyna soqqylaryn darytty, ózi de soqqy jedi. Iаǵnı ol ózin qaı deń­geıde ekenin tolyq baǵamdady. Munyń barlyǵy aldaǵy jekpe-jekte paıdasyn beredi degen oıdamyn, – dedi bas bapker.

Ol sóz sońynda barsha jankúıerlerge rahmet aıtyp, elde otyryp boksshylarǵa jankúıerlik tanytyp jatqan halyqqa alǵys bildirdi.

Qyzdar básekesinde Karına Ibr­a­gımova (57 kg) men Natalıa Bogdanova (66 kg) jarady. Karına da, Natalıa da mońǵolııalyq boksshylardan 5:0 ese­bimen basym túsip, jartylaı fınalǵa ótti. 57 kılo salmaq boıynsha Parıj Olımpıadasyna joldama úzdik tórt boksshyǵa beriletinin eskersek, Karına kem degende Azııa oıyndarynyń medali jáne Olımpıada joldamasyna ıelik etip otyr. 

Álem, Azııa birinshilikterinde atoı salyp júrgen qalǵan boksshy qyz­dary­myz Nazym Qyzaıbaı (50 kg), Jaına Shekerbekova (54 kg) Rımma Volosenko (60 kg) jáne Valentına Halzova (75 kg), ókinishke qaraı, jarysty erte aıaqtady.

Qorjyn toly qola medal

Juma kúni Erlik Sertaı, Elmır Álimjanov, Rýslan Qurbanov, Va­dım Sharlaımov bastaǵan semser­le­sýshilerdiń Azııa oıyndarynyń altyn medalin jeńip alýyna tamasha múmkindik bolǵan edi. Olar fınalda Japonııa quramasyna 35-36 esebimen ese jiberdi. Negizgi ýaqyt 31-31 esebimen aıaqtaldy. Al sheshýshi dýelde Elmır Álimjanov pen jekeleı synnyń jeńimpazy Kokı Kano sheberlik baıqasty. Shıeleniske toly bul aıqas ta teń aıaqtaldy (35-35). Qosymsha ýaqytta japonııalyq sportshy nátıjeli bir soqqy jasap, komandasyna jeńis syılady. Otandastarymyz irikteýde Mońǵolııadan (45-12), shırek fınalda Vetnamnan (45-26), al jartylaı fınalda Gonkongten (45-30) basym tústi.

Aıan Beısenbaev trıatlonnan Azıa­danyń qola medalin ıelendi. A.Beı­senbaevtyń júzýden 1 500 metrdi baǵyn­dyryp, velokezeńde 40 shaqyrym júrip ótip, 10 km júgirip shyqqandaǵy ýaqyty – 1:52:25. Baıraqty básekede altyn medaldi japondyq sportshy Kenjı Nener (1:50:54) aldy. Sondaı-aq kúmis medal da Japonııadan kelgen Makogo Odakýraǵa (1:51:49) buıyrdy.

Velosporttan Qazaqstan quramasy alǵashqy medaldi qorjynǵa saldy. Qola júldeni Artem Zaharov pen Ramıs Dinmuhamedov jeńip aldy. Sportshylar medısonda sátti óner kórsetti. Fınalda Zaharov pen Dinmuhamedov 37 upaı jınap, qola júldege qol jetkizdi.

Karolın Chepkoech Kıpkırýı de 10 shaqyrymǵa júgirýden qola júldeger atandy. Kenııadan arnaıy shaqyrylǵan jelaıaq qyz belgilengen qa­shyq­tyqty 33:15.83 sekýndta júgirip ótti.

О́zbek aǵaıyndardan úlgi alsaq ıgi

Bizge uıymshyl bolý kerek. Azııa oıyndarynda О́zbekstandy medal sany jaǵynan qýyp jete almaıtynymyz aıdan anyq. Sebebi búginde olardyń qorjynynda 11 altyn medal bar. Biz­de bar-joǵy 3 altyn. Aıtpaǵymyz, ózbek aǵaıyndar Azııa oıyndary baǵdar­lamasyna ózderiniń kýrash sportyn 2018 jyly engizipti. Endi sol kúres tú­rinen ózbekter ázirge 4 altyn, 1 kúmis en­shilep otyr. Ázirge dep otyrǵanymyz, atal­ǵan kúres túrinen erler arasynda – 4, áıelder arasynda 3 sal­maqta medalder jıyntyǵy sarapqa salynady. Jerlesterimizdiń arasynan Bekasyl Shaımerdenov (81 kg) qana kúmis medaldi qanaǵat tutty.

Keshegi kúnge deıin 6 salmaqta medalder jıyntyǵy sarapqa salyndy. Sondyqtan ońtústiktegi kórshilerimizdiń altyny budan da kóp bolady dep boljaımyz. Kýrashta tipti, bir salmaqta bir elden eki sportshy qatysýǵa bolady.

О́zbekterdiń Azııa oıyndarynan habar taratyp júrgen Uzbekiston 24 arnasynyń tilshisi Norbek Nııazovtiń aıtýynsha, О́zbekstan kýrash sportyn Olımpıada baǵdarlamasyna engizý úshin baryn salyp, jer-jerden kýrash federasııasyn ashý ústinde. Azııa, álem chempıonatyn uıymdastyryp jatyr.

Bizde she? Barlyǵy kerisinshe. Bir kezderi Arman Shoraev pen Serik Tókeev bastaǵan sport fýnksıonerleri Búkilálemdik qazaq kúresi, Dúnıejúzilik qazaq kúresi dep ulttyq kúresti ary-beri tartyp, ýaqytty qur bosqa ótkizip aldy. Qarap otyrsańyz, qazaq kúresi kýrashtan esh kem túspeıdi. Kerisinshe, ulttyq sportymyz qyzyqtyraq sııaqty. Endigi bar másele, qazaq kúresin álemdik deńgeıge kóterý úshin memleket bolyp jumys isteý kerek. Sonda ǵana qazaq kúresi Azııa oıyndary saıysyna enip, mártebemizdi asyratyn edi. Oılanatyn jáıt!