Jeksenbi, 1 qazan kúni Almaty qalasyndaǵy Koreı Respýblıkasy Bas konsýldyǵy, Koreı Respýblıkasy Elshiligi janyndaǵy Koreı bilim berý ortalyǵy, Koreı Respýblıkasy Týrıstik uıymy, Koreı aýylsharýashylyǵy jáne balyq sharýashylyǵy saýda korporasııasynyń uıytqy bolýymen megapolıstegi eń iri saýda ortalyqtarynyń biri – Mega-Almatyda «Koreıa mádenıeti kúni» atalynyp ótti, dep habarlaıdy Egemen.kz.
Mereke sııaqty is-shara «Qazaqstan-Koreıa-2023 ózara mádenıet almasý jylynyń» ekinshi jylyna arnalyp, oǵan 800-ge jýyq almatylyq ortaqtasty.
Sahnadaǵy LED-ekranda Busan Expo-2030 týraly jarnamalyq rolıkter men koreı týrızmi týraly beınerolıkter kórsetilse, saýda ortaǵyna kelýshiler úshin arnaıy oıyn-saýyq baǵdarlamasy daıyndaldy.
Saýda ortalyǵyna kelgen almatylyqtar K-pop qoıylymdaryn, koreıdiń dástúrli bılerin, barabandy oryndaýdy jáne samýlnorı tobynyń ónerin tamashalady. Saltanatty oqıǵa barysynda qala turǵyndary koreı halqynyń dástúrli «Hanbok» kıimin kıip, dástúrli koreı oıyndaryn oınap, Ońtústik Koreıadaǵy oqý oryndaryna qalaı qabyldanýǵa bolatyny týraly tanystyrylymdardy tyńdap, alýan túrli aqparattar aldy.
Almatylyqtardyń kezekti demalysyna sán bergen is-shara eki eldiń birin biri tereńirek tanyp, tatýlyǵynyń nyǵaıa túsýine ıgi septigin tıgizetini sózsiz. Qalanyń keıbir turǵyndary bul kún Ońtústik Koreıaǵa degen qyzyǵýshylyqtaryn oıatqanyn aıtady.