Kásipqoı boks sharshy alańynda judyryqtasyp júrgen elimizdiń jas talantty boksshylary Bek Nurmaǵanbet (11-0, 9 KO) pen Ábilhan Amanqul (4-0-1, 4 KO) álemdik reıtıngte joǵarylady.
Boksshylardyń statıstıkasyn júrgizetin áıgili Boxrec.com saıtynyń málimeti boıynsha, ekinshi orta salmaqta óner kórsetetin 25 jastaǵy B.Nurmaǵanbet eń keıingi jekpe-jeginen keıin álemdik reıtıngte alty saty joǵarylap, 47-orynnan 41-orynǵa turaqtady. Al orta salmaqta judyryqtasatyn 26 jastaǵy Á.Amanqul segiz oryn joǵarylap, 70-satyǵa jaıǵasty.
Aıta keteıik, eki boksshymyz keıingi aıqastaryn 1 qazan kúni AQSh-tyń Las-Vegas qalasynda meksıkalyq Saýl «Kanelo» Alvares pen amerıkalyq Djermall Charlo arasyndaǵy boks kesheniniń anderkardynda ótkizgen edi. Bek Nurmaǵanbet nıgerııalyq Abımbola Osýndaırony (5-1, 3KO) úshinshi raýndta nokaýtpen jeńse, Ábilhan Amanqul amerıkalyq Djoshon Djeımspen (7-0-2, 4KO) tóreshilerdiń sheshimimen teń tústi.