Memlekettiń tiregi – adal azamattar. Elimizde osy qaǵıdaǵa negizdelgen jańa qoǵamdyq etıka ornyǵýǵa tıis. Qazaqta «Ustazy jaqsynyń ustanymy jaqsy» degen sóz bar. Mektep izgilik qaǵıdalaryn, adamzatqa ortaq qundylyqtardy balalardyń boıyna sińiretin ortalyqqa aınalýy kerek. Bul týraly Prezıdent pedagogter sezindegi baıandamasynda aıtty, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy jas urpaq ádil, adal, únemshil, eńbekqor, bilimpaz, otanshyl ári janashyr bolýǵa umtylýy kerektigin, ulttyń jańa sapasy degen – osy ekenine toqtalyp, tárbıe isinde ulttyq pedagogıka bastaýlaryn da nazardan shyǵarmaǵan jón ekenin, balalarymyzdyń boıyna qazaqtyń salt-dástúri men qundylyqtaryn sińirý asa mańyzdy ekenin atap ótti.
«Halqymyz qashanda úlkenge qurmet, kishige izet kórsete bilgen. Qadir-qasıet, abyroı, paryz sekildi uǵymdarǵa atústi qaramaǵan. Iаǵnı, tól mádenıetimiz de jastar tárbıesinde mańyzdy ról atqarady. Eńbekqorlyqty dáripteý úshin balalardy jastaıynan eńbekke baýlý qajet», dedi Prezıdent.
Qasym-Jomart Toqaev: «Men qoǵamda jıi talqylanatyn taǵy bir máselege toqtalǵym keledi. Qazaqstan – Konstıtýsııa boıynsha zaıyrly memleket. Bul qaǵıda barlyq jerde, sonyń ishinde bilim berý mekemelerinde qatań saqtalýǵa tıis. Mektep – eń aldymen, bilim ordasy. Balalar mektepke bilim alý úshin barady. Al dinı ustanym – ár azamattyń jeke máselesi, óz tańdaýy. Elimizde din bostandyǵyna zańmen kepildik berilgen. Balalarymyz eseıip, dúnıetanymy tolyq qalyptasqan soń óz tańdaýyn jasaǵany durys dep sanaımyn. Eń bastysy, kózqarasy aıqyn, sanasy sergek ári dástúrge berik urpaq tárbıeleý kerek. Jalpy, zaıyrly degen sózdiń mazmuny tereń, óte aýqymdy. Halqymyzǵa qatysty aıtatyn bolsaq, bul – salaýatty ómir saltyn ustaný, pragmatıkalyq kózqarasta bolý jáne dástúrli dinimizge, ulttyq sanany arqaý etken saltymyzǵa shynaıy qurmet degen sóz», dedi.
Prezıdent bilim berý salasynyń aldynda aýqymdy mindet turǵanyn, bul – ulttyń jańa sapasyn qalyptastyrý ekenin, árbir bala mektepten sapaly bilim alyp, jaqsy adam, adal azamat bolyp shyǵýy kerektigin, osy mańyzdy maqsat jolynda tabandy eńbek etý qajet ekenin de aıtty.
«Uly Abaı «Ustazdyq etken jalyqpas, úıretýden balaǵa» degen. Sizder osy qasterli mıssııany árdaıym abyroımen atqarasyzdar dep senemin. Memleket ustazdardyń mártebesi, bedeli joǵary bolýyna árdaıym basa mán beredi», dedi Memleket basshysy.