Kırıll Ponomarenko qazaq tilinde erkin, jatyq sóıleıdi. Oǵan telefon soǵyp, jónimizdi aıtqanymyz sol edi, Kırıll qazaqsha kósile ketti. Shynymen ulty orys pa edi dep oılanyp qalyppyz. Bolmysy da ashyq-jarqyn, jaıdary jan eken.
Kırıll Ponomarenko Qostanaı oblysy Amangeldi aýdanynyń týmasy. «Ortalyq» óńirlik qolbasshylyǵy 6697 áskerı bóliminde birinshi atqyshtar rotasynyń maman baqylaýshysy bolyp qyzmet etedi. Áskerı salaǵa kelgenine nebári eki jyl bolǵan. Qazaq tilin stýdent kúninde úırengen eken. Qazir áskerde ony ári qaraı jetildirip júr.
«Memlekettik tildi úırený, ony damytý Ulttyq ulan qatarynda basty sabaqtardyń biri retinde oqytylady. Árbir Qazaqstan azamaty qazaq elinde týyp, qazaq jerinde ósken soń qazaq tilin bilý mindet dep bilemin», deıdi qatardaǵy jaýynger.
Orys otbasynda dúnıege kelip, mektepte orys synybynda bilim alǵan ol qazaq tilin úırený alǵashynda ońaı bolmaǵanyn aıtady. Onyń tildi tezirek úırenýine stýdent joldastary kóp kómektesipti. Kúndelikti aýyz-eki sóılesý, qazaqsha kitaptardy kóbirek oqý arqyly tildi tez úırenýge bolatynyn aıtty.
«Muhtar Áýezovtiń «Abaı joly» men Ázilhan Nurshaıyqovtyń «Mahabbat qyzyq mol jyldar» atty kitaptaryn qazaq tilinde oqyp shyqtym. Osy kórkem shyǵarmalardaǵy árbir sózge erekshe mán berdim. Oqyp otyryp ózime buryn beımálim bolǵan qazaqtyń shuraıly sózderine qanyqtym. Bul shyǵarmalardy oqý arqyly qazaqtyń ejelden kele jatqan ádet-ǵurpyna, salt-dástúrine tereń boılaýǵa bolady», dedi ol.
Árkez memlekettik tildiń janashyry bolyp júretin ol túrli til saıystaryna qatysyp turady. Jaqynda ǵana ótkizilgen «Memlekettik til meniń tilim» atty ózge ult ókilderi arasyndaǵy respýblıkalyq saıysta taza qazaqsha sóılep, jınalǵan jurtty tańǵaldyrǵany bar. Osy saıysta ol belgili aqyndardyń óleńderin mánerlep oqý, óz ónerin kórsetý sekildi saıys tapsyrmalarynan súrinbeı ótip, ózgelerden oq boıy ozyq shyqty. Sóıtip birinshi oryndy qanjyǵasyna baılady.
Memlekettik tilde erkin sóıleý Kırıll Ponomarenkoǵa kúndelikti ómirde kóp kómegin tıgizip júr. Til bilý arqyly jańa dostar taýyp, ortasy keńeıipti. Biz sóz etken jigittiń talpynysy óz tilin ógeısinip júrgenderge úlgi bolar dep senemiz.