Qaraǵandy oblysynda pılottyq tártipte respýblıkada alǵash ret otbasyǵa kómek kórsetý ortalyǵy ashyldy. Jańa polısııa bólimshesi óńir basshysy Ermaǵanbet Bólekpaevqa tanystyryldy. Bir erekshiligi – bólim qyzmetkerleriniń barlyǵy áıel adamdar, dep habarlaıdy Egemen.kz Polisia.kz saıtyna silteme jasap.
«Biz Qazaqstanda otbasyna kómek kórsetýdiń alǵashqy biryńǵaı ortalyǵyn qurdyq. Oblys ákimdiginiń qoldaýymen turmystyq zorlyq-zombylyqqa qarsy kúres boıynsha qanatqaqty joba iske qosyldy. Ideıa mynada: polısııa organdaryna otbasylyq janjaldar, tóbeleskishter týraly habarlamalar kelip túsedi, biz málimdemeler boıynsha jumys júrgizemiz, biraq jábirlenýshiler tek quqyqtyq kómekke ǵana emes, áleýmettik, psıhologııalyq kómekke de zárý. Biz munyń bárin biriktirdik. Ortalyq bir tereze qaǵıdaty boıynsha jumys isteıdi. Munda polısııadan, zańgerlerden, psıhologtan, sot oryndaýshysynan, teologtan jáne eriktilerden kómek alýǵa bolady. Sondaı-aq medıator, daǵdarys ortalyqtarynyń ókilderi bar», dedi Qaraǵandy oblysy polısııa departamenti bastyǵynyń birinshi orynbasary Qurmanǵalı Ismaǵulov.
Turmystyq zorlyq-zombylyqpen kúresýdiń jańa ádisterin engizý kezinde halyqaralyq tájirıbe eskerilgen. Otbasyna kómek kórsetý ortalyǵyn kóp jyldar boıy áıelderdi zorlyq-zombylyqtan qorǵaý jónindegi aǵa ınspektor bolyp jumys istegen Gúlbaný Sátbaeva basqardy. Eksperımentaldy negizde áıelder polısııa bólimshesi quryldy. Onyń quramyna tergeýshi, ıývenaldy jáne kóshi-qon polısııasynyń ınspektorlary, esirtki qylmysyna qarsy kúres jónindegi jedel ýákil, probasııa qyzmetiniń ókili jáne t.b. kirgen. Qarym-qatynasty múmkindiginshe senimdi etýge talpyný maqsatynda bólim qyzmetkerleri áıel adamdardan ǵana quralǵan.
Ortalyq barlyq qajetti zattarmen jabdyqtalǵan. Qyzmetkerler jedel aqparatqa qol jetkizýi úshin quqyq qorǵaý organdarynyń vedomstvolyq bazalaryna qosylǵan. Áleýmettik blokta kóptegen máseleler qarastyrylǵan. Munda ınklıýzııa, qorǵanshylyq jáne qamqorshylyq mamandary jumys isteıdi. Kelýshiler psıhologtyń kómegin ala alady. Tipti qarjylyq keńesshi bar, ol otbasylyq bıýdjetti durys bólý týraly jáne ınternet-alaıaqtardyń aıla-amaldaryna qalaı túspeý kerektigin aıtady. «Ortalyqtyń jumysyndaǵy eń mańyzdy nárse – azamattyq qoǵamnyń, jergilikti atqarýshy organdar men polısııanyń úzdiksiz ózara is-qımylynyń kópirine aınalýy tıis», dep atap ótti joba bastamashylary.
Túpki maqsat – otbasylyq-turmystyq qatynastar salasyndaǵy quqyq buzýshylyqtardy azaıtýǵa negizdelgen. Esterińizge salaıyq, osy jyldyń 1 shildesinen bastap QR Ákimshilik quqyq buzýshylyq týraly kodeksine túzetýler enip, oǵan sáıkes otbasylyq-turmystyq zorlyq-zombylyq úshin jaza kúsheıtilgen bolatyn.