Asyl qazynany ardaqtap

Is-sharanyń shymyldyǵy batyr­lar­dyń jońǵarlarmen keskilesken ury­sy kórsetilgen kórinispen ashylyp, Qazaq handyǵynyń qazyǵyn qaqqan Kereıdiń aq kıizge kóterilýine ulasty. Kireberiste oryn tepken qaraýyl mu­narasy, jaǵalaı qonǵan aqshańqan kıiz úıler, jastardy terbetken altybaqan, ustalar men sheberlerdiń aýyly, ejelgi dáýir jár­meńkesi qonaqtardy elitip, ejelgi zamanǵa eriksiz jeteledi.

Keń dalada ultymyzdyń baı máde­nıetin ulyqtaǵan is-sharanyń bas­ty maqsaty – umytyla bastaǵan qundy­lyqtardy nasıhattap, tól tarıhymyzdy tarazylap, dástúrli dala mádenıetin dáripteý ári jas urpaqtyń sanasyna babalarymyzdyń ómir daǵdysyn sińirý. Sonymen qatar toı meımandaryna Shý óńiriniń jaýharlary men jetistikteri kórsetildi.

Mádenı is-shara barysynda alań­dy jaǵalaı jaıǵasqan qolóner sheber­leriniń ordasy da kópshilik qaýymǵa erekshe áser syılady. Keıbireýler alańnyń bir bóliginde ótkizilip jatqan at sporty oıyndaryn tamashalap jatsa, endi biri on saýsaǵynan óner tamǵan sheberler men ustalardyń qolóner týyndylaryn kórip, zor qyzy­ǵýshylyqpen qarady. Sondaı-aq qalyń qaýymnyń bir bóligi qaz-qatar tigilgen qazaq úılerde ulttyq dámnen aýyz tıip, aýdannyń qurt jasap, maı shaıqap, tary túıip jatqan qyz-kelinshekteriniń keleli isterine zer saldy.

Ashyq aspan astyndaǵy mereke aıasynda «Qareket» qoǵamdyq qaıy­rym­­­dylyq qory atynan aýdandaǵy úsh ot­basyna saltanatty túrde bas­pana kilti tabys etildi. Sondaı-aq jýyr­da úlken synda jeńis týyn jel­biret­ken sport sańlaǵy, kásibı boks­shy Ba­tyr Júkembaevqa shapan jaby­lyp, zor qur­mettiń belgisi retinde tul­par mingizdi. Al mádenı is-sharanyń sońy qazaq estrada juldyzdarynyń qaty­sýymen kon­serttik baǵdarlamaǵa ulasty.