Qurlyqtyq hokkeı lıgasynda (QHL) óner kórsetetin elordanyń «Barysy» qatarynan ekinshi oıynynda jeńiske jetti. Jerlesterimiz bul joly Máskeýdiń «Dınamosynan» býllıtter serııasynda basym tústi.
Munyń aldynda bes oıynda jeńilip, jankúıerlerin jerge qaratqan «Barys» hokkeıshileri bas bapker aýysqan soń, eńse tiktep keledi. О́z aıdynyndaǵy oıyndar serııasynda alǵash Chelıabiniń «Traktoryn» tize búktirse, kúni keshe «Dınamodan» basym tústi. «Barys Arena» sport kesheninde ótken básekeniń negizi ýaqyty 2:2 esebimen teń aıaqtalyp, býllıtter serııasynda jerlesterimizdiń baǵy jandy.
6 myńǵa jýyq jankúıer tamashalaǵan kezdesýde «Barys» sapynan Ádil Beketaev (4-mınýt) pen Raılı Barber (10-mınýt) mergendik tanytsa, qonaqtardan Djordan Ýıl (7-mınýt) men Nıkıta Gýsev (35-mınýt) mergendigimen kózge tústi. Kezdesýdiń negizgi kezeńi teń eseppen aıaqtalǵan soń oıyn overtaımǵa ulasty. Biraq qosymsha ýaqytta da komandalar shaıba soǵa almady. Sóıtip, jeńimpaz býllıtter serııasynda anyqtaldy. Bul synda elordalyq klýbtyń joly boldy – 3:2. Endi «Barys» kelesi oıynyn búgin Iаroslavldiń «Lokomotıv» komandasymen, 15 qazanda Magnıtogorskiniń «Metallýrg» klýbymen ótkizedi.