El sportshylarynan eń kóp synalǵany da, jankúıerler tarapynan eń kóp minelgeni de fýtbolshylar edi. О́zge sport túrindegi sańlaqtar syn saǵattarda súrinse de, dál fýtbolshylar sııaqty «taıaqtyń» astyna qalmaǵan. Fýtbolshylar degende kórermenderdiń arqasy qozyp, oraıy kelse, syn sadaǵynyń astyna alýdan aıanyp qalmaıtyn. Bálkim, ózimiz qazaq bolyp týsaq ta, fýtbolshylarymyzdyń brazılııalyqtar sııaqty dop tepkenin qalap turǵandyqtan sóıtken shyǵarmyz. Áıteýir sondaı ótpeli kezeńderdi, qıyn sátterdi artqa tastap, bárine shydas bergen aıaqdopshylarymyz búginde el jankúıerleriniń súıiktisine, súıkimdi fýtbolshylaryna aınalyp otyr.
Qazaq fýtbolynyń tarıhyna kóz júgirtseńiz, jerlesterimizdiń buǵan deıin eshqashan Eýropa birinshiligine dál munshalyqty jaqyn bolmaǵanyn, buǵan deıingi birde-bir irikteý saıystarynda upaı sanyn 10-nan árige asyra almaǵanyn, osy kúnge deıingi irikteý oıyndarynda Sýomı eliniń saıypqyrandarymen jasyl alańda san márte jolyqsa da, eshqashan jeńe almaı kele jatqany sııaqty ókinishti jaıttarǵa qanyq bolasyz. Endi bul – tarıh. Keshegi kúnnen bastap qazaq fýtbolynda tarıhtyń jańa paraǵy ashyldy. Fınlıandııaǵa sapar shekken fýtbolshylarymyz tamasha kambek jasap, fýtbol jankúıerlerin bir serpiltip tastady. Osy bir ǵajap jeńisten keıin Berlınge barar jolda nebári eki-aq qadam qaldy. Sondaı-aq tarıhta birinshi ret upaı sany 15-ten asyp, týrnır kestesinde kóshbasshylarmen ıyq tirestirip keledi. Eń bastysy, qazaq fýtbolshylaryna alynbaıtyn qamal, jeńilmeıtin qurama bolǵan Fınlıandııa aqyry tize búkti. Jáne fınderdi jaı ǵana jeńip qoımaı, óz alańynda, kerek deseńiz san myńdaǵan jankúıeriniń kóz aldynda jer qaratyp jeńdik.
Osy matchtan birer kún burynǵy Danııamen ótken oıynda jerlesterimiz jeńilse de jigerli oıynymen jankúıerlerdi uıatqa qaldyrǵan joq. Alań qojaıyndary qansha jerden azýly bolsa da, bizdiń jigitter dat fýtbolshylaryna qasqaıyp qarsy tura aldy. Alańnyń árbir shebinde olardan bir mysqal da kem oınaǵan joq. Osy kezdesýdi teledıdar arqyly tamashalaǵan elimizdegi fýtbol jankúıerleri de, aıaqdop mamandary da Fınlıandııamen naǵyz tartysty oıyn bolatynyn ishteı sezip, sol oıynda bir ǵajaıyptyń bolaryna senim bildirgen-di.
Al Helsınkıdegi match Qazaqstan úshin de, Fınlıandııa úshin de taǵdyrsheshti mańyzdy oıynnyń biri edi. О́ıtkeni jeńiske jetkeni Eýroǵa shyǵý múmkindigin saqtap qalsa, jeńilgenine Eýroǵa shyǵý armanyn taǵy da tórt jylǵa keıinge shegere turýyna týra keledi. Biraq Qazaqstan quramasy jeńilip qalsa da pálendeı eshteńe joǵalta qoımas edi, óıtkeni bizdiń Ulttar lıgasynyń pleı-off kezeńi arqyly da Berlınge baratyn múmkindigimiz saqtalyp tur. Fınderde mundaı múmkindik joq.
Sol sebepti de alań qojaıyndary birinshi taımda ne bel, ne belbeý ketedi degen oımen alǵashqy mınýttan alǵa qaraı tura umtyldy. Maqsaty tezirek gol soǵyp, ári qaraı oıyndy óz baqylaýlarynda ustaý bolatyn. Áıtkenmen bizdiń qorǵanysqa jaýapty jigitterimiz asa saýatty óner kórsetip, qaqpamyzǵa gol soǵýǵa esh múmkindik bergen joq. Shabýyldan túk shyǵara almaǵan alań qojaıyndary gol soǵýdyń syryn standartty jaǵdaıdan izdeı bastady. Aldymen olar úsh mınýtta úsh márte buryshtama dobyn teýip kórip edi, onysynan da nátıje shyǵara almady. Keıinnen 27-mınýtta Aleksandr Marochkın aıyp alańyna jaqyn mańaıda qarsylastyń oıynshysyn ereje buzý arqyly toqtatty. Sóıtip, fınder taǵy bir standartty jaǵdaıǵa ıe boldy. Shamamen 20-25 metr jerden Robert Teılordyń qaqpaǵa qaraı tepken joıqyn soqqysyn áýelde Igor Shaskıı qaıtarǵandaı bolyp edi, biraq Shaskııdiń qolyna tıip ótken dop báribir qaqpa torynan tabyldy – 1:0. Osy goldan keıin fınlıandııalyqtar qorǵanysqa kóbirek kóńil bóle bastady.
Matchty tolyq tamashalaǵan jankúıerler sózimizdi qýattaıtyn shyǵar, oıynnyń ekinshi bóligi bizge Qazaqstan men Danııa arasyndaǵy birinshi oıyndy eske túsirdi. Sol kezdesýdegideı bul matchta da oıyn taǵdyryn bir penaltı túbegeıli ózgertip jiberdi. Jáne bul 11 metrlik aıbyn dobyn taǵy da Baqtııar Zaınýtdınov sátti oryndady. Danııamen bolǵan oıynda da Baqtııar gol soqqannan keıin Taǵybergen men Aıymbetov mergendik tanytsa, bul joly bar júkti Zaınýtdınov óz moınyna alyp, Fınlıandııa qaqpasyna bir emes, eki gol soqty. Eki goldyń arasy – bar bolǵany 13-aq mınýt.
Osylaısha, Qazaqstan quramasynyń fýtbolshylary Sýomı elinde ótken oıynda tarıhı jeńiske qol jetkizip, taǵy bir tarıhı sátti jańartýǵa mańyzdy qadam jasady. Endi bizdiń jigitter óz alańymyzda San-Marınomen (17 qarasha), syrt alańdaǵy Slovenııa (21 qarasha) quramasymen ótetin eki oıynda da jeńiske jetse, el fýtbolshylary Berlındegi ala dop alamanynda alǵash ret dop tebedi.
PS: Osy oıynda eki márte dáldik tanytyp, mergendigimen kózge túsken Baqtııar Zaınýtdınov óziniń ulttyq qurama jeıdesindegi 14-golyn soǵyp, surmergender kóshinde jeke-dara kósh bastady. Buǵan deıingi úzdik kórsetkish elimizdiń dańqty fýtbolshysy, qazirgi tańda ulttyq qurama bas bapkeriniń kómekshisi bolyp júrgen Rýslan Baltıevke tıesili edi. Ol óz mansabynda 13 márte daralanǵan. Sondaı-aq keshegi matchtan keıin ulttyq qurama oıynshylarynyń barlyq týrnırde soqqan gol sany 251-ge jetti.