Qonaev qalasynyń ortalyq alańynda uıymdastyrylǵan «Sheber-Fest» respýblıkalyq qolóner festıvaline elimizdiń ár aımaǵynan 40-tan asa on saýsaǵynan óner tamǵan qolóner sheberleri qatysyp, halqymyzdyń máńgilik murasyna aınalǵan atakásiptiń san alýan túrin kórermender nazaryna usyndy. Sheberlerdiń kóz jaýyn alatyn qolóner buıymdaryna qala jurtshylyǵy men qonaqtary úlken qyzyǵýshylyq tanytty. Sonymen qatar arnaıy jabdyqtalǵan sahna tórinde «Adyrna» folklorlyq ansambli men tanymal óner ujymdary halyqtyq án-bılerin oryndap, festıvaldyń mán-mańyzyn arttyrdy.
«Festıvaldy uıymdastyrýdaǵy maqsat – halyqtyq qolónerdi, salt-dástúr, mádenıetimizdi nasıhattaı otyryp, jas urpaqtyń boıyna sińirý jáne dáripteý. Oǵan qosa, oblys ortalyǵy Qonaev qalasyndaǵy mádenı is-sharalardyń jandanýyna atsalysý. Búgingi festıvalda zergerlik óner, qyshtan qumyra jasaý, kıiz basý, keste toqý syndy qolóner túrlerimen tanysýǵa bolady. Sharaǵa Shymkentten zergerlik ónerdiń has sheberi, Qazaqstan sýretshiler odaǵynyń múshesi Áshirbek Jeldibaev bastap, Astana qalasynan Berik Álibaıuly, Jetisý oblysynan Esjan Ahmetov, Almaty oblysynan ulttyq naqyshta aıaqkıim tigýdiń sheberi Ásel О́mirbekova, tizbeleı bersek ár óńirdiń keń tanylǵan qolóner maıtalmandary qatysýda», degen festıvaldy uıymdastyrýshy, Qazaqstanǵa belgili qolóner sheberi Dáýlet Dárkembaıuly osyndaı is-sharalar arqyly qolóner sheberleriniń isin ilgeriletip, kásibin keńeıtýge memleket tarapynan qoldaý kórsetilip qalar degen úmiti baryn aıtyp qaldy.
«Buryndary «Atakásip» degen arnaıy baǵdarlama bolǵan edi, qazir ol jumys istemeıdi. Al osy sheberlerdiń arasynda otandyq ónim shyǵaratyn elimizge ǵana emes, álemge áıgili azamattar bar. Biraq olarǵa memleket tarapynan qoldaý kemshin», degen pikirin bildirdi.
Qazaqstannyń túkpir-túkpirinen jınalǵan sheberlerdiń qysh qumyralary, zergerlik buıymdary, aǵash, tabıǵı teri men toqyma, kıiz ónimderinen jasalǵan zattary qoıylǵan kórme jumysy qyza tústi.
Sheberlerdiń qolóner buıymdaryna qyzyǵýshylyq tanytqan turǵyndar ózderine qajetti zattaryn satyp alyp, qýanyshqa keneldi. Ásirese Jambyl aýdanyndaǵy Uzynaǵash aýylynan kelgen «Qadam kz» brendiniń negizin qalaýshy Ásel Bolatqyzynyń taza teriden tigilgen ulttyq naqyshtaǵy aıaqkıimderi kóp nazaryn aýdartty. Ol taza bylǵarydan áıelder men erlerge, balalarǵa arnalǵan aıaqkıimder tigýmen turaqty túrde aınalysyp keledi.
«2015 jyly óz ónimderimizdi shyǵara bastadyq. Buǵan deıin sheteldik kórmelerge de qatystym. Biz jasaǵan aıaqkıimderdi sıngapýrlyqtar, japondyqtar, qytaılar, ıtalııalyqtar kıip júr. Álemge aty áıgili Dımash Qudaıbergenniń de jeke tapsyrysyn oryndadyq», degen otandyq aıaqkıim tigýdiń sheberi qazir naryqta ulttyq naqyshtaǵy kıim-keshekke suranys artyp otyrǵanyn alǵa tartty.
«Bizdiń maqsat – ulttyq qundylyqtarymyzdy dáripteý, qazaqy oıýmen órnektelgen aıaqkıimderdi kúndelikti qoldanysqa engizý. Ol úshin aıaqkıimderdiń baǵasyn qoljetimdi ettik, 6 myń teńgeden 120 myń teńgege deıin baǵalanady. Qazir ujymda 5 maman bar. Taǵy da úırenemin, osy salany meńgeremin deýshiler bolsa, esigimiz árdaıym ashyq. Bizdiń ónimder Almatydaǵy bazarlarda, onlaın saýda ortalyqtaryna qoıylǵan. Halyq arasynan suranys jyldan-jylǵa artyp keledi», dedi Ásel Bolatqyzy.
Ulttyq aıaqkıim tigý sheberiniń bul oıyn astanalyq zerger Berik Sátinbekuly da quptaı ketti.
«Ulttyq ónerimizdiń kenjelep qalǵan kezderi boldy. Soǵan qaramastan, atamuramyzdan qol úzbedik. Meni atam, ákem zergerlikke bala jasymnan baýlydy. Qazir balalarym da zergerlikpen aınalysady. Rasynda da, otandyq ónimge suranys óte joǵary. Sondyqtan elimizdiń bas qalasynan jeke mýzeıimdi de ashtym. Osyndaı sharalar kóptep uıymdastyrylyp, qazaqy mádenıet, salt-sana, ádet-ǵurpymyz nasıhattalyp jatsa nur ústine nur», deıdi sheber.
Sheberliktiń bıik shyńyna eseli eńbekpen ǵana shyǵýǵa bolatyndyǵyn pash etken qolóner sheberleriniń festıvaline kelgen qala jurtshylyǵy men jastar ustalyqtyń, qyshtan qumyra jasaýdyń, jún ıirip, toqyma toqýdyń, keste tigýdiń ádis-tásilderine kóz júgirtip qana qoımaı, sheberlik dáristerin de tamashalady.
Almaty oblysy