Halqymyz «Jaqsynyń jaqsylyǵyn aıt, nury tasysyn» dep beker aıtpaǵan. Jyly sóz adamdy jigerlendiredi, ómirge qushtarlyǵyn arttyrady, jan saraıyn jańǵyrtady. Keıde biz janymyzda júrgen jaqsy adamdardyń iskerlik qasıetin baǵalaı almaı jatamyz. Birimiz onyń istep jatqan jumysyna ishteı súısinsek, endi bireýler ony moıyndaǵysy kelmeıdi.
Naǵyz kásibı ofıser týraly jazýdy kópten beri oılap júr edim. Polkovnık Dáýren Qýanyshulynyń esimi Shekara akademııasymen qatar UQO jáne Shekara qyzmetindegi áskerı qyzmetshilerge jaqsy tanys. Shekarashy kýrsanttarǵa tárbıe berýde ónegeli úlgisi, jańashyldyq joly, bastamashyl is-áreketimen abyroıly qyzmet atqaryp júrgen tájirıbeli shekarashynyń tynymsyz eńbegi qandaı qurmetke de laıyq. Janynyń tazalyǵy, kóńiliniń adaldyǵy, qarapaıym minezi men qyzmettegi bilgirligi úshin ony úlgi tutyp syılaıdy, árdaıym bilikti maman retinde qurmetteıdi.
Dáýren Qýanyshuly Shekara akademııasynda qyzmet etedi. Tárbıelik, áleýmettik-quqyqtyq jáne ıdeologııalyq jumystar basqarmasy bastyǵynyń orynbasary. Tártip pen tárbıe tizginin teń ustaǵan tárbıeshi ofıser. Osy oqý ornynyń 1998 jylǵy túlegi. Ol oqý dıvızıondary arasynda jáne qalaaralyq uıymdastyrylǵan KTK oıyndaryna qatysyp, talaı ret kóptiń kóńilinen shyǵyp ónerpaz atanǵan. Keıinnen qyzmet atqara júrip, kýrsanttardy osy ónerge baýlyp, birneshe ret júldeli oryndarǵa qol jetkizip, Reseıdiń Sochı qalasyna deıin baryp, kýrsanttardyń ónerin pash etip kelgen.
Polkovnık áskerı shenine deıin jetken shekarashy kez kelgen iste tııanaqtylyqty talap etedi. Bir nárseni oıyna aldy ma, sony aıaǵyna deıin jetkizbeı tynbaıdy. Búginde onyń bastamasymen Shekara akademııasynda kóptegen ıgi is júzege asyrylyp keledi. Atap aıtqanda, akademııa emblemasynyń eskızin jáne kádesyı buıymdarynyń dızaınyn jasaýdy jáne bitirýshi túlekterge dańqty qolbasshy Baýyrjan Momyshuly týraly jazylǵan Aleksandr Bektiń «Volokolamskoe shosse» kitabyn saltanatty túrde tabys etý rásimin dástúrge aınaldyrdy. Sonymen qatar shekarashy ofıserdiń kelissózder júrgizýdegi sheberliginiń nátıjesinde Almatydaǵy Halyq banktyń «Freedom Life» qyzmetkerlerimen ortaq mámilege kelip, qarjylaı qoldaý kórsetýdi uıymdastyryp, eki birdeı psıhologııalyq túzetý jáne ońaltý zerthanasynyń paıdalanýǵa berilgenin aıta ketkenimiz jón.
«Jas shekarashy» balalar áskerı-patrıottyq klýby men akademııanyń Áıelder qaýymdastyǵy uıymynyń júzege asýyna da Dáýren Qýanyshuly tikeleı sebepshi boldy. Oqý ordasynyń oń ımıdjin qalyptastyrý maqsatynda abyroıyn asqaqtatyp, bedelin bıiktetetin beınerolıkterdi montajdap, áleýmettik jelilerge turaqty túrde jarııalap turýdy ádetke aınaldyrǵan kreatıvti ofıser keıingi jastarǵa jıǵan tájirıbesin úıretýden jalyqqan emes. Ujymda jas ofıserler «basqarma ensıklopedııasy» dep ataıtyn keıipkerimizdiń aqyl-keńesine júginýdi úrdiske aınaldyrǵan. О́z kezeginde olar da kez kelgen ýaqytta jolyǵyp, oı-pikirlerin ortaǵa salyp, árdaıym kóńilge qonymdy, tolyqqandy keńes alyp turady.
Dáýren Belgojaevtyń taǵy bir ereksheligi – onyń tula boıy tolǵan ıdeıa. Mamandyǵyn jete meńgergen, jınaǵan tájirıbesi mol tálimgerdiń uıymdastyrýshylyq qabileti erekshe damyǵan. Mysaly, naýryz aıynda Shekara akademııasynda ótken halyqaralyq TMD Shekara áskerleri qolbasshylyǵy keńesiniń ókilderine uıymdastyrylǵan konserttik baǵdarlamasyn TMD Shekara áskerleri keńesiniń tóraǵasy, armııa generaly V.Kýlıshovtiń ózi joǵary baǵalap, marapattaǵan.
Ǵasyrǵa jýyq tarıhy bar Shekara akademııasynyń toqsan jyldyǵyna oraı oqý ordasynyń tynys-tirshiliginen syr shertetin qundy kitaptyń jaryq kórýine tikeleı atsalysqan Dáýren Qýanyshuly ondaǵy kemshilikterdi, jetispeı turǵan jerlerdi kórsetip, mereıtoılyq kitaptyń sapaly bolyp shyǵýyn myqtap qolǵa aldy. Qashanda izdeniste júretin bilikti ofıser ujymdaǵy áriptesterimen birge akademııa aýmaǵyndaǵy stendter men bannerlerdiń, oqý dıvızıondarynyń mádenı-aǵartý múlikterin jáne «Erlikpen qaza tapqan Shekara akademııasynyń túlekteri» memorıaldyq eskertkish taqtanyń boı kóterýine atsalysty.
Akademııa basylymy «Akademııa: Búgin. Erteń. Keshe» atty aılyq gazetiniń jaryq kórýine qoldaý bildirgen tárbıeshi ofıser jaqynda ǵana Ulttyq Qaýipsizdik Komıteti baspasóz qyzmetimen kelisip, telegram-kanaldy iske qosýǵa muryndyq boldy. Sondaı-aq akademııa tarıhynan habardar etetin sýrettermen kómkerilip, sapaly bezendirilgen toqsan saıyn jaryq kóretin albomnyń shyǵýyna bastamashylyq jasady. Áriptesimizdiń atqaryp jatqan jumysy aýqymdy ári ár alýan. Biz mańyzdy degenderine ǵana toqtalyp óttik.
Qolynan kelse jaqsylyq jasap, kishige – aǵa, úlkenge ini bolyp júretin jaqsy qasıetteri únemi kóz aldymyzda. Bireýlerge istegen jaqsylyǵyn buldamaıtyn asyl qasıeti taǵy bar. Olaı bolsa, sózi de ótimdi, qolynan is te keletin naǵyz ofıserdiń qyzmetine sáttilik tilep, osy qarqynyńnan taıma degimiz keledi.
Janat JABYRBEKOV,
UQK Shekara akademııasynyń baspasóz hatshysy