Yntymaǵy uıysqan Uzynaǵash aýylynyń úlken-kishisine tegis tanys Olıanyń jolyn apta saıyn asyǵa kútetinder az emes. Osylaı atap ketken aýyl turǵyndaryna qushaq-qushaq gazet-jýrnal jetkizetin Olga Dildebaeva poshtada qyzmet etkeli otyz jyldy ortalapty.
Kásiptik kolledjdi támamdap, 18 jasynan bastap aýyldyq poshta bólimine jumysqa ornalasqan ol osy kúni aýdan ortalyǵyndaǵy shamamen jalpy uzyndyǵy 10 shaqyrymdy quraıtyn 27 kóshedegi 1 300 tútinge 500-den asa gazet, 100 shaqty jýrnal men hat-habar, sálem-saýqat pen zeınetaqysyn ýaqtyly jetkizýdi óz jaýapkershiligine alǵan. Ony taratyp bitpeıinshe Olıanyń damyl tappaıtyny anyq.
«1988 jyldan beri osy salada eńbek etip kelemin. Gazet-jýrnal taratýdyń qıynshylyǵy az emes. Ártúrli jaǵdaı kezdesip jatady. Itten de, adamnan da qorqatyn jaıttar bolady. Iyǵymyzǵa arqalaıtyn júktiń de salmaǵy jeńil emes. Soǵan qaramastan oqyrmanǵa jazylǵan gazet-jýrnalyn keshiktirmeı qolyna tabystaýǵa tyrysamyz. «Kóńil kóńilden sý ishedi» demekshi, jaıaýlap júretin jumysymyzǵa alǵys jaýdyratyn keńpeıil turǵyndardyń tilegine qanattanyp, kóńilimiz marqaıyp qalatyn kezder de joq emes. Osy jumysym arqyly aýyldastarymdy túgelge jýyq tanyp aldym», deıdi tájirıbeli poshtashy O.Dildebaeva.
Jyl on eki aıdaǵy aýa raıynyń qubylmalyǵy men qıyndyǵyna moıymaı kóshe aralaıtyn eńbegi eskerýsiz qalmaǵan Olga Qalyshbekqyzy tabandylyǵy úshin 2013 jyly «Úzdik baılanysshy» tósbelgisin alǵan eken. Buǵan qosa merekelik sharalarda ıelengen alǵyshattary da bar. Búginde tájirıbeli poshtashy ǵana emes, jetkizý ýchaskesiniń brıgadıri bolyp taǵaıyndalǵan. Marapattyń eń úlkeni tutynýshylardyń alǵysy ekenin aıtqan Olıa bıyl óziniń jumysyn jeńildetý ári jyldamdatý maqsatynda elektromoped satyp alǵan eken. Zamanaýı tehnıkany tizgindegen Olıaǵa qyzyǵa qaraıtyndar osy kúni alǵyspen qatar, aq jol tileýdi ádetke aınaldyrǵan.
«Oqýshy shaǵymyzda poshtaǵa baryp, bir qushaq gazet-jýrnaldy úıge ákelýshi edik. Jáne osy bir ádemi sáttiń óz raqaty bar. Keıde úıge jetkenshe gazetti aqtaryp, maqalalardy oqyp tastaıtynbyz. Poshta terezesinen Olıa tátemiz qol bulǵap, kúlimdep qarsy alatyn. Mine, bıyl poshtada aqadal qyzmet etip jatqanyna 36 jyl tolypty. Eshkimge nazdanbaıdy. Uzynaǵashty bes saýsaǵyndaı biledi», deıdi áriptesimiz Almas Sádýaqas.
Júzinen meıirim tógilip turatyn poshtashynyń eńbekqorlyǵy men adamgershiligi áli talaı taqyrypqa arqaý bolary aqıqat.
Almaty oblysy