Memleket basshysy Qasym-Jomart Toqaev Jetisý oblysyna jumys sapary barysynda Úshtóbe qalasyndaǵy áleýmettik nysandardy aralap kórdi, dep habarlaıdy Egemen.kz Aqorda baspasóz qyzmetine silteme jasap.
Memleket basshysy Úshtóbe qalasynda bıyl ashylǵan 30 oryndyq jataqhanasy bar Gýmanıtarlyq kolledjge bardy.
Munda bolashaq pedagogterge «Mektepke deıingi tárbıe jáne oqytý», «Bastaýysh bilim berý pedagogıkasy jáne ádistemesi» mamandyqtary boıynsha bilim beriledi.
Oqý ornynda 17 zamanaýı aýdıtorııa, májilis jáne sport zaldary, medısınalyq kabınet, ashana men býfet bar. Kolledj ınklıýzıvti orta talaptaryna saı jabdyqtalǵan, ıaǵnı erekshe qajettilikteri bar adamdar úshin pandýs pen arnaıy lıft qoıylǵan.
Sonymen qatar Memleket basshysy Úshtóbedegi orta mektepti aralap kórdi.
Bilim oshaǵy 1963 jyly salynǵan. 1996 jyly mektepke Kemel Toqaevtyń esimi berilgen.
Prezıdentke qalamger Kemel Toqaevtyń shaǵyn kabınet-murajaıy tanystyryldy. Munda jazýshynyń shyǵarmalary, tutynǵan jeke zattary qoıylǵan.
Sondaı-aq Memleket basshysy bıyl salynyp, halyq ıgiligine berilgen dárigerlik ambýlatorııa jumysymen tanysty. Atalǵan medısınalyq mekeme bir aýysymda 50 adamdy qabyldaı alady. Emdelýshiler úshin stasıonar, fızıoterapııa, prosedýralyq, ekpe salý, gınekologııa jáne basqa da medısınalyq kabınetter jumys isteıdi.