Májilis spıkeri Erlan Qoshanov óziniń Facebook paraqshasynda Kostenko shahtasynda qaza bolǵan kenshilerdiń jaqyndary men týystarynyń qaıǵysyna ortaqtasyp, kóńil aıtty, dep habarlaıdy Egemen.kz.
«Qaraǵandy oblysynan kelgen qaraly habar barshamyzdyń qabyrǵamyzdy qaıystyryp otyr. Kostenko shahtasynda qaza bolǵan kenshilerdiń jaqyndary men týystarynyń qaıǵysyna ortaqtasyp, kóńil aıtamyn. Zardap shekkenderdiń tezirek saýyǵyp, úılerine oralýyn tileımin», dep jazdy Erlan Qoshanov.
Májilis tóraǵasy Facebook paraqshasynda atalǵan másele Memleket basshysynyń erekshe baqylaýynda ekenin jáne Prezıdent Úkimetke shuǵyl tapsyrma bergenin jazdy. Kenshilerdiń otbasylaryna barlyq kómek kórsetiledi. Oqıǵanyń mán-jaıyn anyqtaý úshin Úkimettik komıssııa qurylyp, jumysyn bastady. Shahtada bolǵan tótenshe jaǵdaıǵa qatysty Bas prokýratýra qylmystyq is qozǵady, oqıǵa ornynda Májilis depýtattary da júr.
«Memleket basshysy Úkimetke «Arsellor Mıttal Temirtaý» kompanııasymen ınvestısııalyq yntymaqtastyqty toqtatýdy tapsyrdy. Bul másele buǵan deıin de talaı ret kóterilgen bolatyn. Kompanııaǵa tıesili ken oryndarynda mundaı qaıǵyly oqıǵalar jıilep ketti. Árıne, bul eń aldymen osy kompanııanyń jaýapkershiliginde ekeni sózsiz. Sondyqtan Prezıdenttiń atalǵan tapsyrmasyn depýtattar birden-bir durys sheshim dep tolyq qoldap otyr. Memleketimiz úshin esh nárse adam ómiri men densaýlyǵynan artyq emes. Eldegi barlyq ınvestorlar men óndiris kompanııalary osy ustanymdy basshylyqqa alýǵa tıis», dedi Májilis tóraǵasy Erlan Qoshanov.