Taıaý kúnderi Almatydaǵy №7 Qalalyq klınıkalyq aýrýhanaǵa osydan 10 jyldaı ýaqyt buryn jambas býyny almastyrylǵan pasıent óte aýyr jaǵdaıda jetkizilgen bolatyn. Jaraqattyń saldarynan sementsiz ádispen bekitilgen protez naýqastyń jambas qýysyna kirip ketken, dep habarlaıdy Egemen.kz aýrýhananyń baspasóz qyzmetine silteme jasap.
Aýrýhananyń polıjaraqat bólimshesi meńgerýshisi Ramazan Áskerovtiń aıtýynsha, burynǵy protez urshyq oıyǵyna kirip ketkendikten, jambas qýysy qatty zaqymdanyp, naýqas birden jansaqtaý bólimine jetkizilgen.
Dárigerler pasıenttiń jaǵdaıy durystalǵannan keıin polıjaraqat bólimshesine aýystyryp, klınıka basshylarynyń qatysýymen konsılıým ótkizgen.
«Mundaı jaǵdaılar óte sırek kezdesedi. Biz eki kezeńnen turatyn ota jasaý týraly sheshim qabyldadyq. Birinshi otada ish qýysy arqyly synǵan protez bólshekterin alyp shyqtyq. Naýqastyń jaǵdaıy jaqsarǵannan keıin revızııalyq endoprotez ornattyq. Bul ortopedııalyq operasııa ishindegi eń aýyr otalardyń biri. Iаǵnı, bir ret ota jasalǵan jerdi qaıta qozǵap, kelesi operasııany jasadyq. Travmatolog-ortopedter men anestızıologtar komandasynyń biliktiliginiń arqasynda kúrdeli ota sátti ótti», deıdi Ramazan Áskerov.
Pasıent otadan keıin ekinshi kúni tósekte ózdiginen otyryp, úshinshi kúnnen bastap arnaıy qurylǵynyń kómegimen júre bastaǵan.
«Bul joǵary tehnologııaly operasııa. Pasıenttiń burynǵy býynynyń ornyna jasandy protez salamyz. Mundaı operasııalardy barlyq klınıkalar jasaı bermeıdi. Ol úshin arnaıy daıyndyqtan ótken mamandar men qural-jabdyqtar qajet. Onyń ústine, Qazaqstanda endoprotezdeý operasııalaryn mindetti áleýmettik medısınalyq saqtandyrý arqyly tegin jasatýǵa bolady», deıdi dáriger.
Osylaısha almatylyq dárigerler joǵary tehnologııalardyń kómegimen jaǵdaıy óte aýyr naýqasty aıaǵyna turǵyzdy.
ALMATY