«S. Seıfýllın atyndaǵy Qazaq agrotehnıkalyq zertteý ýnıversıteti» KeAQ men «Saryarqa» aýdany ákimdiginiń qoldaýymen aýyl sharýashylyǵy ónimderiniń jármeńkesi uıymdastyryldy, dep habarlaıdy Egemen.kz.
«Jármeńke elorda turǵyndaryn áleýmettik jaǵynan qoldaý maqsatynda uıymdastyryldy. Jármeńkege et jáne túrli azyq-túlik taýarlar kóp mólsherde jetkiziledi. Taýarlar turǵyndarǵa qoljetimdi baǵada satylady. Taýar sapasy da joǵary. Jármeńkege negizinen ýnıversıtetimizdiń qosalqy sharýashylyqtarynda ǵalymdarymyz ben stýdentterimizdiń ósirgen aýyl sharýashylyq ónimderi men ýnıversıtet seriktesteriniń óndirgen ónimderi saýdaǵa shyǵaryldy», dedi S.Seıfýllın atyndaǵy QazATZÝ qarjy dırektory E.K.Arapbaev.
Jármeńkege qala turǵyndarynyń qazirgi suranysyna ıe deldalsyz tikeleı kelgen ónimder shyǵaryldy. Atap aıtqanda, 10 tonna et, 200 kg balyq, 25 tonna jemis pen kókónis, 10 tonna sút ónimderi men kondıterlik ónimder satyldy. Mundaǵy qaýipsiz jáne qunarly ónimder qala turǵyndaryna, ýnıversıtet qyzmetkerleri men stýdentterge qoljetimdi baǵada satylǵanyn atap ótýge ábden bolady. Jármeńkede satylǵan taýarlardyń barlyǵy taýardyń ózindik qunymen satylǵandyqtan, jármeńkeni uıymdastyrýdaǵy negizgi maqsat – qys aıyna qamdanǵan qala turǵyndaryna qolaıly jaǵdaı jasaý.
Jármeńkeni QazATZÝ basqarma múshesi, birinshi prorektor A.Abdırov kirispe sózben ashyp, jármeńke jumysyna sáttilik, satýshylar men tutynýshylarǵa tabys tiledi. Aýyl sharýashylyq mınıstrliginiń Agrarlyq azyq-túlik naryqtary jáne aýyl sharýashylyǵy ónimin qaıta óńdeý departamenti basshysynyń mindetin atqarýshy Sh.Ahmetov mınıstrlik tarapynan bul sharaǵa qoldaý bildirip, uıymdastyrýshylarǵa rızashylyǵyn jetkizdi. Astana qalasy Saryarqa aýdany ákiminiń orynbasary M.Jalpybaev qatysyp, jármeńkege jınalǵan qaýymǵa bereke, jármeńkeni uıymdastyrýshy S.Seıfýllın atyndaǵy Qazaq agrotehnıkalyq zertteý ýnıversıtetiniń basshylyǵynyń bul bastamasynyń jalǵasty bolýyna tilektestigin bildirdi. Sondaı-aq iri aýyl sharýashylyq uıymynyń quryltaıshysy S.Eskendirov óz kezeginde ýnıversıtet túlegi ekendigin maqtan tutatynyn, sondyqtan da bilimniń qara shańyraǵynda ótetin is-sharalarǵa árkez qoldaý bildiretinin atap aıtty.
Ýnıversıtet tarapynan jármeńkege qatysýshylar úshin arnaıy konserttik jáne sporttyq baǵdarlamalar uıymdastyryldy. Syrtta ornatylǵan LED ekrannan QazATZý týraly beınefılmder kórsetilip, jármeńkege kelýshilerge ýnıversıtet týraly mol maǵlumat berildi.
Jármeńkege kelgen qala jurtshylyǵy, ýnıversıtet qyzmetkerleri men stýdentter arasynda gir kóterýden jarys uıymdastyryldy.
О́te tartysty da qyzyqty ótken jarystyń nátıjesinde:
1-shi oryn A. Ismaılov - QazATZÝ sharýashylyq bóliminiń qyzmetkeri (dánekerleýshi);
2-shi oryn A. Abdyrken - qala turǵyny;
3-shi oryn B. Nýrtılahan – QazATZÝ tehnıkalyq fakýltetiniń 1-kýrs stýdenti jeńip aldy.
Jeńimpaz ben júldegerlerge arnaıy ýnıversıtet ákimshiligi men kásipkerlikti damytý jáne komersıalızasııalaý departamenti taǵaıyndaǵan arnaıy syılyqtar tabys etildi.
Jármeńke kórigin qyzdyrǵan S.Seıfýllın ýnıversıtetiniń seriktestesterine QazATZÝ Basqarma tóraǵasy-rektory M.Tireýovtyń Alǵys haty tabys etildi.