Senat tóraǵasy Máýlen Áshimbaev Birikken Arab Ámirlikterine sapar barysynda osy eldiń Toleranttylyq jáne qatar ómir súrý mınıstri sheıh Nahaıan ben Mýbarak Ál-Nahaıanmen kezdesti. Suhbat kezinde taraptar ózara seriktestikti odan ári nyǵaıtý jáne parlamentaralyq yntymaqtastyqty keńeıtý keleshegin talqylady.
Kezdesý barysynda halyqaralyq kún tártibindegi kóptegen másele boıynsha Qazaqstan men Birikken Arab Ámirlikteriniń strategııalyq ustanymdary bir-birine óte jaqyn ekeni atap ótildi. Naqty aıtqanda, beıbit qatar ómir súrýge umtylý jáne toleranttylyq ıdeıalaryn dáripteý, búgingi syn-qaterler men jahandyq máselelerge qarsy turý jolynda kúsh jumyldyrý baǵytyndaǵy ortaq kózqarastar sóz boldy. Abý-Dabıde ótken halyqaralyq konferensııada din kóshbasshylarynyń ekologııalyq máselelerdi sheshýge qatysý máselesi de nazardan tys qalǵan joq.
Máýlen Áshimbaev klımattyń ózgerýi jahandyq deńgeıde, onyń ishinde Qazaqstan úshin de eń ózekti máselelerdiń biri ekenin atap ótti. Osyǵan baılanysty ol Álemdik jáne dástúrli dinder kóshbasshylary seziniń tujyrymdamasyn iske asyrý aıasynda atalǵan máselelerdi sheshýge yqpal etýge daıyn ekenin jetkizdi.
«Klımattyń jahandyq ózgerýi bizdiń óńirde sý tapshylyǵyna jáne agroónerkásiptik keshendi damytýda túrli problemaǵa alyp keledi. Bul másele búkil álemge de qaýip tóndiretini anyq. Sondyqtan osy baǵyttaǵy barlyq syndarly kúshtiń birlesip áreket etýi mańyzdy. Osyndaı kúrdeli kezeńde ózara túsinistik pen syılastyqty damytý erekshe mánge ıe. Jahandyq problemalardy, onyń ishinde ekologııalyq máselelerdi sheshýde din qaıratkerleriniń de áleýetin tıimdi paıdalaný kerek dep esepteımiz», degen Senat spıkeri aldaǵy SOR28 Klımat konferensııasynyń sátti ótýine tilektestik bildirdi.
Osy kúni Máýlen Áshimbaev Birikken Arab Ámirlikteriniń Prezıdenti sheıh Muhammed bın Zaıd Ál-Nahaıanmen kezdesti. Kezdesýde din lıderleriniń joǵary róli sóz boldy. Sondaı-aq rýhanı dıplomatııanyń jahandyq máselelerdi jáne ózekti máselelerdi beıbit jolmen sheshýge yqpal etýi mańyzdy ekeni atap ótildi.
Sonymen qatar Máýlen Áshimbaev ıslam, hrıstıan, ıýdaızmniń dinı ǵıbadathanalaryn biriktirgen keshenge bardy.
Sapar kezinde qazaqstandyq delegasııa músheleri «Abu Dhabi Global Market» halyqaralyq qarjy ortalyǵynyń qyzmetimen tanysty. Aıta keteıik, jahandyq qarjy ortalyqtarynyń reıtınginde 32-orynda turǵan bul uıym Astana halyqaralyq qarjy ortalyǵymen de belsendi yntymaqtastyq ornatyp otyr. Atalǵan eki Uıym arasynda 3 tıisti memorandýmǵa qol qoıylǵan.
Qazaqstan senatorlary «Hub71» tehnologııalyq ekojúıe ortalyǵynda BAÁ-niń startaptardy qoldaý jumysymen tanysty. Onyń negizgi mindeti – aqparattyq tehnologııalar men ınnovasııalar salasyndaǵy startaptar men kompanııalardy qoldaý jáne yntalandyrý. Ortalyq startaptardy kapıtalmen, sarapshylardy qoljetimdilikpen qamtamasyz ete otyryp, olarǵa jasandy ıntellekt, kıberqaýipsizdik, qarjylyq tehnologııalar jáne densaýlyq saqtaý salalarynda qoldaý kórsetedi.