Senator Andreı Lýkın Úkimet basshysynyń atyna joldaǵan depýtattyq saýalynda Halyqaralyq baǵdarlamalar ortalyǵynyń jumysyndaǵy jaǵymsyz jaıttarǵa toqtaldy, dep habarlaıdy Egemen.kz Senattyń baspasóz qyzmetine silteme jasap.
Depýtat Ortalyqtyń jumysyn tıisti uıymdastyrýdyń joqtyǵy men Ǵylym jáne joǵary bilim mınıstrligi tarapynan tıisti úılestirýdiń bolmaýynan shetelde kadrlardy daıarlaýǵa jáne olardyń biliktiligin arttyrýǵa bólingen qarajat tıimsiz paıdalanylyp kelgenin nemese urlanatynyn atap ótti. Al bul óz kezeginde bıýdjettiń negizsiz shyǵyndaryna ákep soǵady.
«Stıpendıattardyń eńbek etýi men olardy oqytýǵa jumsalǵan bıýdjet qarjysyn óteýge monıtorıng júrgizetin tıimdi tetik joq. «Bolashaq» túlekteri halyqaralyq Bolashaq stıpendııasyn taǵaıyndaýǵa arnalǵan úmitkerlerdi irikteý qaǵıdalaryna sáıkes Qazaqstanǵa oralý jáne mamandyǵy boıynsha úzdiksiz eńbek etý týraly talaptardy ylǵı da buzyp keledi. Osyndaı 1 myń derek belgili», dedi senator.
Depýtat sondaı-aq qarjyny qaıtarý máselesine Premer-mınıstrdiń nazaryn aýdardy. Senator mysalǵa memleketke 6,6 mlrd teńge kólemindegi bereshek týraly aıtylatyn statıstıkany keltirdi.
«Joǵaryda atalǵan derekter oqytýdyń maqsatsyz baǵyttaryn pash etip otyr. Shetelde alǵan mamandyq paıdalanylmaıdy, joba jekelegen jaǵdaılarda emıgrasııa quralyna aınaldy, 270 túlek shetelde qaldy. Joba sonymen qatar oqý týrızmine aınaldy. Ortalyq is júzinde eńbek naryǵynyń naqty qajetine sáıkes shetelde mamandar daıarlaýdy uıymdastyrý deńgeıiniń tómendigin kórsetip otyr. Strategııalyq jáne baǵdarlamalyq qujattardyń bolmaýy, salalyq mınıstrlik tarapynan tıisti úılestirýdiń joqtyǵy osyndaı jaǵdaıǵa sebep bolyp tabylady», dedi Lýkın.