Qarshadaıynan aýyl-aımaqqa sheberligimen, sýretshiligimen tanylǵan Aldabergen taǵy top jardy. Aǵashtan, matadan, teri men júnnen, temirden neshe túrli buıym jasaıtyn oǵan súıekten oıyp kádesyılar jasaý, saqına-syrǵa, ózge de buıymdar daıyndaýdyń esh qıyndyǵy joq. Beıneý aýdanynyń Sarǵa aýylynda turatyn, osyndaǵy Álibı atyndaǵy mektepte eńbek páni boıynsha sabaq beretin sheber jigit bul joly biz úshin aty azaptyń, qıyndyqtyń lebindeı esip-estiletin Magadanǵa baryp top jaryp, 1-oryn alyp oraldy.
Magadanda qazannyń 24-i men qarasha aıynyń 1-i aralyǵynda ótken IV «Álem halyqtarynyń súıek oıý óneri» festıvaline alty el men Reseı federasııasynyń 23 aımaǵynan súıekten túıin túıgen 100-den asa avtor qatysty. Dástúrli halyqtyq ónerge qoldaý kórsetip nasıhattaý, damytý jáne ár eldegi súıekten buıym jasaýshylardyń ózara baılanysyn, tájirıbe almasýyn qamtamasyz etý maqsatyndaǵy aýqymdy joba Reseı sýretshiler odaǵy Qıyr Shyǵys federaldyq okrýgi basshylyǵynyń bastamasymen uıymdastyrylǵan.
– Astanadan Máskeýge 3 saǵat, Máskeýden Magadanǵa 9 saǵat ushtyq. Kezinde atam Bozjigit aıdaýda bolǵan Magadan nemeresi – meni qonaq retinde qabyldady. Itjekkenge babalarymyzdyń qalaı tiri jetkenine, azap pen birge sýyq aýa raıynan qalaı tiri kelgenine tańdanysymdy áli shekteı almaı júrmin. Magadan qalasynyń soltústigindegi bıik tóbeniń basyna ornalasqan «Maska skorbı» dep atalatyn saıası qýǵyn-súrgin eskertkishine bardyq, tutqyndar týraly qandaı da bir derek tabylar ma eken degen oımen Magadan oblystyq memlekettik arhıvine bardym. Atam týraly málimet taba almadym, áıtse de elden «meniń atam týraly derek joq pa eken?» dep habarlasyp jatqan kóptegen jerlesim úshin arhıvpen qalaı onlaın baılanys ornatýǵa bolatyndyǵyn bildim, – deıdi Aldabergen Jaılaýuly.
Aldabergenniń aıtýynsha, Amerıka, Eýropa elderiniń sheberleri sanksııaǵa baılanysty saıysqa qatysa almaǵan, biraq qyzyǵýshylyq tanytyp, óz týyndylaryn usynǵandar sany kóp, baıqaýdyń aýqymy keń bolǵan.
– Kórmeden keremet áser alyp oraldym, endi ózimiz úshin sheberlik deńgeıin bir saty joǵary ustaýym kerek. Myqty sheberlermen tanysyp, kásibı biliktiligimdi shyńdadym. Kelesi jyly ótetin festıvalǵa shaqyrtý aldym, bul maǵan úlken izdenispen tynbaı jumys jasaý kerektigin uqtyrady, – deıdi sheber.
Aýylǵa kele salysymen Mańǵystaý oblysynyń Astana qalasyndaǵy mádenı kúnderine shaqyrtý alǵan Aldabergen Tilenbaevtyń «Adaı kóterilisi» ınstallıasııasy «Dala órkenıeti kóshpeliler qolónerinde» kórmesine qoıyldy.
– Installıasııada Mańǵystaý qazaqtarynyń otarshyldyq júıege qarsy synbaǵan asqaq rýhy beınelengen. Qazaq dalasyn jaýlaǵan patsha ókimetiniń atqan oǵy Mańǵystaý qazaqtarynyń qalqanynan ótkenmen, súıegine jetpedi, ór halyq mádenıeti men dástúrin saqtaı bildi, týyndyda osy oıdy beınelegim keldi, – deıdi avtor.
Aldabergen sheberdiń jetistikteri az emes, alaıda Magadanda 27 eldiń myqtylaryna shań qaptyryp, top jarýy ázirge eń úlken jetistigi. Bul – bolashaǵyna jasalǵan taǵy bir baspaldaq ekeni anyq.
Mańǵystaý oblysy