Premer-mınıstr Álıhan Smaıylovtyń tóraǵalyǵymen Saýd Arabııasy Koroldigimen birlesken keńes ótti. Kezdesýde taraptar ınvestısııalyq jobalardy júzege asyrý máselelerin ortaǵa saldy, dep jazady Egemen.kz primeminister.kz-ke silteme jasap.
Atap aıtqanda, Jetisý oblysynda qýattylyǵy 1 GVt bolatyn iri jel elektr stansııasyn salý jobasy talqylandy. Qazirgi ýaqytta daıyndyq jumystary júrip jatyr. Sońǵy kelisimge qol jetkizilgennen keıin 2025 jyly qurylysty bastaý josparlanǵan.
Premer-mınıstr ákimshilik rásimderdi jedeldetýdi jáne ortalyq memlekettik organdar tarapynan barlyq qajetti sheshimderdi bir kúnde ázirleýdi tapsyrdy.
Sondaı-aq keńeste aýyl sharýashylyǵy, farmasevtıka, metallýrgııa jáne t. b. salalarda jańa jobalardy júzege asyrý máseleleri talqylandy.
Álıhan Smaıylov Saýd Arabııasynyń ınvestorlarymen jumysty barlyq deńgeıde jandandyrýdy tapsyrdy. Syrtqy ister mınıstrligi, Qazaqstannyń Jıddadaǵy dıplomatııalyq ókildigi, «Kazakh Invest» ulttyq kompanııasy jáne basqa da múddeli memlekettik organdar men uıymdar belsendi pozısııany ustanýy qajet ekenine basa nazar aýdardy.
Jıyn sońynda Premer-mınıstr Úkimetaralyq komıssııanyń taıaýda bolatyn otyrysy qarsańynda eki el kásipkerleriniń qatysýymen taqyryptyq bıznes-forým uıymdastyrýdy tapsyrdy.