Tórtkúl dúnıege ortaq fýtbol oıyny aýyl balalaryna tańsyq emes. Aladop aıaqqa ilinse, qoldan qaqpa jasap, ekige jaryla jarysa ketý – úırenshikti ádis. Jasyl alań, jaqsy dop bolmasa da fýtboldan habary bar ár bozbalanyń kókeıinde aty ańyzǵa aınalǵan Pele, Maradonadan bastap, búgingi Ronaldý, Messıdiń oıyn órnegi turary haq.
Bularǵa qosa otandyq fýtbolshylarymyz Abat Aıymbetov, Ashat Taǵybergen, Baqtııar Zaınýtdınov, Islambek Qýat, Abzal Beısebekovterdiń izinen ileskisi keletin aýyl balalarynyń qııalyna qanat bitirip, olardy sporttyń osy túrine baýlýdy nıet etken jýrnalıst ári sport janashyry Serik Mámbetov dopqumar balalardan jasaqtalǵan komandalardyń jattyǵýyna, jarystarǵa qatysýyna, bir sózben aıtqanda, aýyl fýtbolyn damytý maqsatynda respýblıkalyq «AýylFýtbol» jobasyn júzege asyrýǵa kirisip ketkeli úsh jyldyń júzi boldy. Osy ýaqyt aralyǵynda joqtan bar jasap, birqatar iske uıytqy bolǵany belgili.
Jýyrda atalǵan jobaǵa «Halyq» qaıyrymdylyq qory kómek qolyn sozyp, ekijaqty memorandýmǵa qol qoıdy. Qarasaı aýdany Jibek joly aýlyndaǵy «Aq-Barys» sport kesheninde ótken ıgi is-sharaǵa «AýylFýtbol» jobasynyń negizin qalaýshy Serik Mámbetov jáne «Halyq» qaıyrymdylyq qory Almaty oblystyq fılıalynyń dırektory Ǵalymbek Jaqsylyqov qatysty. Sondaı-aq jan jylytar jańalyqty estigen aýyldaǵy fýtbol komandalary men ata-analar jınalyp, ózge óńirlerden at terletip jetken sport janashyrlary da tóbe kórsetti.
«Eki ulymdy fýtbol oınatý úshin qalaǵa tasymaldaýmen, kepteliste turýmen kúnimiz ótetin. Oǵan ekiniń biriniń múmkindigi bola bermeıdi. Osyny eskere kele Raıymbek aýylynan komanda qurýdy qolǵa alǵan edik, alǵashynda 25 bala jınala ketti. Osydan-aq aýyl balalarynyń fýtbolǵa degen qyzyǵýshylyǵyn, yntasyn kórdik. Sodan bergi úsh jyl ishinde 120 bala turaqty túrde fýtbolmen aınalysyp jatyr. Aýylda stadıon joq. Soǵan qaramastan mektepterdiń alańynda jattyqqan jas fýtbolshylardyń jetistikteri az emes», deıdi «AýylFýtbol» jobasynyń jetekshisi S.Mámbetov.
Dese de, bar máseleniń qarjyǵa tireleri aıtpasa da túsinikti. Osy bir túıtkildiń túıinin tarqatý jolynda «Halyq» qaıyrymdylyq qory atalǵan jobanyń jandanýyna qolushyn berýdi jón sanapty. Aldaǵy ýaqytta aýyldaǵy jas óskinniń fýtbol oıyndaryna qatysyp, shynyǵýyna, dodaly jarastarda baq synasýyna úlken múmkindikter týady.
О́z kezeginde bas demeýshiler 100 aýyldyń balalar fýtbol komandasyna jattyǵý jabdyqtaryn satyp alýǵa járdemdesýdi, aýyl komandalary arasynda 17 oblystyq týrnır jáne respýblıkalyq deńgeıde fınaldyq týrnır ótkizýdi, 100 aýyl jattyqtyrýshysyn ÝEFA-nyń «D» sanaty boıynsha oqytý, sondaı-aq Almaty oblysy qurama komandalarynyń oqý-jattyǵý úderisin jáne olardyń bedeldi jarystarǵa qatysýyn qamtamasyz etýdi óz mindetine alyp otyr. Jyl on eki aıda júzege asatyn jumys jospar aıasynda 3 myńnan asa aýyl balasyn qamtý kózdelgen.
Buǵan deıin bıyl maýsym aıynda «Halyq» qaıyrymdylyq qory Almaty oblysynan kelgen 200-den asa jas fýtbolshynyń basyn qosqan eki kúndik Halyk Open Cup týrnırine demeýshilik jasady. Úzdik oıynshylardan Almaty DUFL lıgasy men Almaty balalar lıgasyna qatysatyn komanda jasaqtaldy.
Qor komandany qajetti qural-jabdyqtarmen qamtamasyz etip, qalaǵa jetkizý aqysyn tóledi. Nátıjesinde, 2013 jyly týǵan balalardan quralǵan «AýylFýtbol» komandasy DUFL qola júldegeri atansa, al 2014 jyldan keıingi týǵan balalar komandasy Almaty Balalar lıgasynyń chempıony boldy. Qordyń «AýylFýtbol» jobasyn qoldaýy tabysty ári tıimdi bolýda, oǵan aýyldyq balalar fýtbol komandalary arasynda qyzyǵýshylyqtyń artýy jáne «AýylFýtbol» jobasy aýqymynyń keńeıýi dálel.
Halyk Open Cup týrnıri ótkennen keıin «AýylFýtbol» jobasy aýyldardaǵy balalar komandalary arasynda burynǵydan da tanymal bola tústi. Týrnırden keıingi úsh aı ishinde jobaǵa qatysýshy komandalar sany 35 paıyzǵa, ıaǵnı 24-ten 32 komandaǵa deıin ósti. Osy 3,5 jylda birneshe joba júzege asyrylǵan. Atap aıtsaq, Qarasaı aýdanyndaǵy Raıymbek jáne Abaı, Ashybulaq, Kóksaı, Irgeli aýyldarynda, sondaı-aq Qyzylorda oblysynyń Tórebaı aýlynda jańa klýbtar qurylǵan. Jýyrda Túrkistan jáne Soltústik Qazaqstan oblystarynda birneshe klýb ashylady dep kútilip otyr. Sonymen qatar Almaty jáne Aqtóbe oblystarynda 2 fýtbol alańy salyndy.
«Kishkene ister saıasaty» atty balalar komandalaryn qoldaý baǵdarlamasy iske qosylyp, 80-nen asa balalar komandasy demeýshiler kómegimen jattyǵý jabdyqtarymen, formalarmen, doptarmen qamtyldy.
«Ártúrli shaǵyn jobalarǵa birqatar demeýshi tartyldy. 35-ten asa, onyń ishinde 6 respýblıkalyq týrnır ótkizildi. Aýyl komandalary jattyqtyrýshylaryna 30-dan asa semınar ótkizildi», deıdi joba jetekshisi.
«Futbol Week End» atty baǵdarlama aıasynda sport jarystary, mádenı-tanymdyq is-sharalar jáne dárister ótkizilgenin ataý artyq etpes. Eresekter men ata-analardyń fýtbolǵa qyzyǵýshylyǵyn arttyrý maqsatynda 2 ret «Otbasy jáne fýtbol» festıvali uıymdastyrylyp, jobaǵa qatysýshy 30-dan asa komanda túrli jarystardyń, sonyń ishinde halyqaralyq jarystardyń turaqty qatysýshylaryna aınalǵan. Máselen, Mańǵystaýdyń «Aqshuqyr» komandasy Qazaqstan chempıony jáne Qyrǵyzstanda ótken halyqaralyq týrnırdiń jeńimpazy atanǵan.
«AýylFýtbol» jobasy búginde birqatar oblysta qanat jaıǵan. «Halyq» qaıyrymdylyq qory densaýlyq saqtaý, bilim berý, sport, mádenıet jáne áleýmettik qorǵaý sııaqty qoǵamdyq ómirdiń mańyzdy salalarynda aýqymdy qaıyrymdylyq jobalaryn júzege asyrý jáne qoldaý boıynsha tabysty qyzmet atqaryp keledi. Qor qyzmetiniń basym baǵyttarynyń biri – sport salasyndaǵy jobalardy qoldaý», deıdi Ǵalymbek Jaqsylyqov.
Qaıyrymdylyq is-sharalary munymen shektelmeıdi. Atalǵan qordyń keshendi qoldaý kórsetý maqsatynda 2019-2020 jyldarǵa arnalǵan «Halyq lıgasy» qaıyrymdylyq baǵdarlamasy aıasynda Ulttyq basketbol federasııasynyń jattyqtyrýshylar quramyn jalaqy qorymen qamtamasyz etý jáne balalar úıiniń tárbıelenýshilerin «Úmit kýbogi» chempıonatyna daıyndaý úshin sport qural-jabdyqtaryn satyp alý túrinde kómek kórsetilgen.
Bıyl 4 maýsymda «Halyq» qorynyń qoldaýymen Almaty qalasynda barlyq stıldi karateden halyqaralyq týrnır ótti. Týrnırge qatysýshylardyń jartysynan kóbi júldeger atandy. Tatamıge Ýkraına, Tájikstan, О́zbekstan, Qyrǵyzstan, Ázerbaıjan, Túrikmenstan, Mońǵolııa jáne Qazaqstannyń ár óńirinen, sonyń ishinde shaǵyn aýyldardan 500 sportshy shyqty. Jarysqa túrli jastaǵy balalar qatysty. Olardyń eń kishkentaıy 5 jasta bolsa, eń úlkeni – 17 jasta. Bul balalar úshin zor jetistik ári úlken múmkindik bolǵany anyq.
Osyndaı jobalar arqyly «Halyq» qaıyrymdylyq qory Prezıdent Qasym-Jomart Toqaevtyń Joldaýynda aıtylǵan buqaralyq sportty damytý týraly tapsyrmasyn júzege asyrýǵa atsalysyp keledi. Sondaı-aq sportty damytýǵa jáne nasıhattaýǵa, myqty sportshylardy anyqtaýǵa, óskeleń urpaq arasynda salamatty ómir saltyn nasıhattaýǵa úles qosyp jatyr.
Almaty oblysy
Sýrette: jasyl alańda jas fýtbolshylar