Áleýmettik jelide Shákárim ýnıversıtetiniń stýdentteri tıisti oqý ornynyń kúzetshisin týǵan kúnimen quttyqtap jatqan áserli vıdeo tarady. Tosyn syıdy kútpegen kúzetshiniń áreketi jurtty súısintti, dep jazady Egemen.kz.
Vıdeoda stýdentter tort alyp, sol kúni jumysta bolǵan kúzetshige «Týǵan kúnińmen» ánin shyrqaǵan. Er adam tańǵalyp, ne bolyp jatqanyn bir sátke túsinbeı qalǵan. Kúzetshi stýdentterdiń áreketine eljirep, birneshe ret alǵysyn bildirdi.
Jeli qoldanýshylary vıdeonyń astyna «Jaqsy adam ekeni kórinip tur», «Qandaı baqytty», «Men ony bilemin, ol keremet adam» degen syndy pikirler qaldyrǵan.
Beınejazbadaǵy adamnyń esimi Mamyrbek Táshkenbaev ekeni belgili boldy. Kelisimshart negizinde ýnıversıtettiń kúzet qyzmetin kórsetetin jaýapkershiligi shekteýli seriktestikte jumys isteıdi.
«Ol bizben úsh jyldaı jumys isteıdi. Osy jyldar ishinde ol ózin sanaly, uqypty maman retinde kórsetti. Áriptester men ýnıversıtet basshylyǵy ony óz isin jaqsy biletin, jaýapty, maqsatty qyzmetker retinde biledi jáne qurmetteıdi. Ol – súıikti jar, áke jáne ata», dep atap ótti JOO baspasóz qyzmeti.