Pisirgen toqashy táp-tátti bolyp shyǵady, bálishin úıdegiler talasa-tarmasa jep qoıady. Sonda «nege osylardy kóbirek pisirip, saýdaǵa shyǵarmasqa?» degen oı keldi. Sol oıdyń basyna sart ete qalǵanyna qazir sondaı rıza. Áıtpese, kásipkerlikke kele qoıýy ekitalaı edi.
Kent ortalyǵyndaǵy dúkenderge jáne basqa da saýda oryndaryna toqashyn, bálishin aparsa, kóp uzamaı telefon soǵyp «taǵy da ákelesiń be?», deıtin boldy. Bul, árıne, muny qýantyp tastaıtyn. Sóıtip, 3-4 jyl ýaqyt ótti. Qaltaǵa tıyn-teben tústi, kóńilge úmit pen senim uıalady.
«Mynaý paıdaly kásip, jaqsy násip bolǵaly tur eken». Kent ortalyǵyna naýbaıhananyń kerektigi sezilip turdy. Gúlnar nan jáne nan ónimderin shyǵaratyn shaǵyn naýbaıhana uıymdastyrýǵa bekindi. Soǵan yńǵaıly ǵımaratty jalǵa aldy. «Injý» jeke kásipornyn ashty. Bul – 2016 jyl bolatyn.
Eńbek etse, istiń kózin taba bilse, sharýa ońynan dóńgelenip sala beredi eken ǵoı. Árıne, qıynshylyqtar da kezdespeı qalmaıdy. Biraq iske berilip ketken kezde sol qıyndyqtar da baıqalmaı keıin ysyrylyp qala beredi eken. Keshegi múmkin emes degenińe qolyń jetken saıyn alǵa umtyla túsedi ekensiń. 2020 jyly Ulytaý aýdanynyń ákimi jas kásipkerlerdi qoldaý maqsatynda grant jarııalaǵan edi. Qatysyp kórip edi, jeńimpazdar qatarynan tabyldy. Sol granttyń qarjysyna óz qaltasyndaǵyny qosyp, ǵımaratty tolyqtaı óz menshigine satyp aldy. Endi bıznes burynǵydan góri tıimdi de paıdaly bola tústi.
Qazir Gúlnar Janalınovanyń «Injý» jeke kásipornyna qarasty naýbaıhanasynda kúnine 500-600 bólke nan pisiriledi. Kenttegi 5-6 dúken men birneshe uıymdardyń ashanasynan kún saıyn tapsyrys úzilmeıdi. «Ystyq nan» jegisi kelgender naýbaıshynyń ózine kelip te alyp ketip jatady.
– Qazir qaramaǵymda 4 naýbaıshy bar. Olar pisiredi, tapsyrys berýshilerge jetkizýshi – ózim. Jeńil kóligim bar. Undy da Jezqazǵannan sol kóligim arqyly ózim ákelemin, – degen Gúlnardyń sózinen onyń tynymsyzdyǵy baıqalady. О́zi aıtqandaı, «áıtpese, bıznes júrmeıdi ǵoı».
«Injý» búginde kondıterlik ónimder de shyǵara bastady. О́ıtkeni suranys bar.
Ásirese kúzden kóktemge deıin el kúzdik soǵym soıyp, bir-birin qonaqqa shaqyryp jatady ǵoı. Mine, sondaıda dastarqannyń sánin keltiretin táttilerdi buryndary qalaly jerlerden tasymaldap júretin jurtshylyq endi Jezdiniń óz basynan alatyn boldy. Elge – yńǵaıly, kásipkerge – ońtaıly.
Kóptegen kásipker tárizdi Gúlnar da qaıyrymdy, meıirimdi sharýalardan shet qalǵan emes. Árbir juma saıyn belgili bir mólsherde nandy tegin taratady. Sol sııaqty Oraza kezinde kenttegi joq-jitik jandarǵa tegin taratý maqsatynda meshitke kún saıyn nan jetkizip turady.
Etken eńbek esh ketpeıdi. 2020 jyly Gúlnar Janalınovanyń Ulytaý aýdanynyń «Úzdik kásipkeri» atandy. 2023 jyly 8 naýryz qarsańynda oblystyń isker áıelderi quramynda oblys ákiminiń qabyldaýynda boldy.
– Qazirgi kezde kásipkerlikke qoldaý kóp. Aýdan, oblys deńgeıinde ártúrli grant berilip jatady. «Kásip ashamyn» degenge múmkindik te mol. Enjarlyq, jalqaýlyq – kásipkerdiń qas jaýy. Nıet, umtylys, izdenis – dostary. Sondyqtan jumys joq deı bermegen durys. Memleket barlyq múmkindikti jasap otyr, tek sony paıdalana bilý kerek. Kásipker bolý úshin eshqandaı «kóke» kómektese almaıdy. Árkim ózi umtyla bilsin! – deıdi kásipker G.Janalınova. О́ziniń basynan ótkenine qarap túıgen oıy – osy. Jınaǵan tájirıbesin kóppen bóliskeni.
Tutas bir kentti nanmen qamtamasyz etip otyrǵan kásipkerdiń isine qalaısha súısinbeske?
Aıtpaqshy, Gúlnar Janalınova kezinde jýrnalıst bolýdy armandaǵan eken. Gazet redaksııasynda jumys istegen de kórinedi. Biraq ómir basqasha jol usynypty. Oqasy joq, nanyn jýrnalıstıkadan jeı almasa da, endi, mine, jaqsy keıipkerleriniń birine aınalyp, jýrnalıske de nan taýyp berip otyr. Ol elge qandaı jolmen bolsa da nan syılaýǵa jaratylǵan-aý.
Ulytaý oblysy,
Jezdi kenti