Fýtboldan ulttyq qurama oıynshylary Slovenııadan elge oraldy. Olardy jankúıerler men Týrızm jáne sport mınıstri E.Marjyqpaev N.Nazarbaev halyqaralyq áýejaıynan saltanatty túrde qarsy aldy, dep habarlaıdy Egemen.kz.
Búgin N.Nazarbaev halyqaralyq áýejaıynda fýtboldan ulttyq qurama oıynshylaryn saltanatpen qarsy alý rásimi ótti.
«Sizder búkil qazaq halqyna, tipti fýtboldan, jalpy sporttan alys jandarǵa esten ketpes erekshe áser, emosııa syıladyńyzdar. О́z oıyndaryńyz arqyly jankúıerlerdiń otandyq fýtbolǵa degen senimin qaıtaryp, elimizdiń halyqaralyq arenadaǵy ımıdjin kóterdińizder. Keshe túnde búkil el uıyqtamaı, sizder úshin teledıdar aldynda taqymyn qysyp, jankúıer boldy. Sizder bul dodada úlken erlik jasap, qazaq halqyn bir maqsat aıasyna uıystyra aldyńyzdar. Bul erlikterińiz kópke úlgi, myńdaǵan jas bala sizder sııaqty bolýdy, bolashaqta ulttyq qurama sapynda oınaýdy armandaıdy. Qazaq halqyna úlken qýanysh syılaǵandaryńyzǵa kóp rahmet, jigitter», dedi Ermek Marjyqpaev.
Qarymta matchta ulttyq qurama qarsylasqa ese jiberse de jankúıerler fýtbolshylardy asa qurmetpen, tııanaqty daıyndyqpen kútip aldy. Jınalǵandar fýtbolshylarǵa qurmet retinde dáliz jasap, sap túzedi. Arnaıy banerler arqyly jankeshti oıyn úshin eldiń alǵysyn jetkizdi.
О́z kezeginde aıaq dop sheberleri men jattyqtyrýshylar quramy Slovenııamen bolǵan kezdesý Qazaqstan ýaqytymen tún ortasynda ótse de, qoldaýsyz qaldyrmaǵan jerlesterine rızashylyǵyn bildirdi.
Eske salaıyq, Qazaqstan quramasy 21 qarashaǵa qaraǵan túni qonaqta, Eýro-2024 irikteý týrnıri aıasynda Slovenııa fýtbolshylarymen kezdesip, asa tartysty ótken oıynda qarsylastaryna 2:1 esebimen jol berdi.
Ulttyq qurama Eýro-2024 oıyndaryna fınaldyq irikteý kezeńderi arqyly toptan shyǵyp, tikeleı joldama ala almasa da, Ulttar lıgasy arqyly atalǵan múmkindikke áli de úmitker.
Bul synda Qazaqstan quramasyn 2004 jylǵy Eýropa chempıondary atanǵan Grekııa quramasy kútip tur. Match 2024 jyldyń naýryz aıynda Afınada ótedi dep josparlanǵan.