Bıyl 1 qazandaǵy esep boıynsha zeınetaqy aktıvteriniń jalpy kólemi 17,2 trln teńgeden asty, bul byltyrǵymen salystyrǵanda 22,1 paıyzǵa artyq. Osy rette Ulttyq banktiń senimgerlik basqarýyndaǵy BJZQ zeınetaqy aktıvteri 99,9 paıyz boldy. Zeınetaqy aktıvterin saqtaý jáne tabystylyqty qalyptastyrý úshin Ulttyq bank óziniń ınvestısııalyq portfelin únemi ártaraptandyrady. Iаǵnı aktıvter belgili bir kólemde úırenshikti qarjylyq quraldarǵa salynbaıdy, jaǵdaıdy eskere otyryp júıeli túrde ózgerip otyrady.
Ulttyq banktiń senimgerlik basqarýyndaǵy BJZQ ınvestısııalyq portfeliniń jalpy kólemindegi memlekettik baǵaly qaǵazdardyń (MBQ) úlesi bir jylda 61,10 paıyzdan 64,98 paıyzǵa (onyń ishinde QR MBQ – 47,18 paıyz), syrtqy basqarýdaǵy aktıvterdiń úlesi 9,8 paıyzdan 12,71 paıyzǵa deıin ósti. Qazaqstan Respýblıkasy jáne sheteldik emıtentterdiń korporatıvtik oblıgasııalarynyń úlesi kerisinshe 19,08 paıyzdan 15,56 paıyzǵa deıin, depozıtter úlesi 7,36 paıyzdan 4,12 paıyzǵa deıin tómendedi.
Sonymen qatar portfeldi ártaraptandyrý valıýtamen de júzege asyrylady. 2023 jylǵy qyrkúıektiń aıaǵynda qarjy quraldarynyń ınvestısııalyq portfeli valıýta úlesi mynadaı:
ulttyq valıýta – 68,17 paıyz (bir jyl buryn – 70,17 paıyz); AQSh dollary – 31,8 paıyz (bir jyl buryn – 29,75 paıyz); basqa valıýtalar – 0,03 paıyz (bir jyl buryn – 0,08 paıyz).«Portfeldegi merzimdi ózgeristerge negizdelgen mundaı ınvestısııalyq strategııa oń nátıjelerge ákeledi. Bıyl toǵyz aıda ınvestısııalyq belsendilik nátıjesinde, sondaı-aq valıýta baǵamynyń turaqsyzdyǵyna jáne qarjy quraldarynyń naryqtyq qunynyń ózgerýine baılanysty taza ınvestısııalyq tabys kólemi 1,4 trln teńgege jetti. Bul byltyrǵy sáıkes kezeńmen salystyrǵanda 91,1 paıyzǵa artyq», deıdi Ranking sarapshylary.
BJZQ zeınetaqy aktıvteri boıynsha ınvestısııalyq qyzmettiń mundaı oń nátıjeleri buryn-sońdy bolmaǵan geosaıası shıelenis, týrbýlenttik ekonomıkalyq jaǵdaı jáne aqsha-nesıe saıasatynyń qatańdaýy kezeńinde bolǵanyn atap ótken jón deıdi sarapshylar. Sonymen qatar Qazaqstannyń bul máseledegi ustanymy basqa eldermen salystyrǵanda qolaıly jáne áserli.
«Mysaly, Norvegııanyń memlekettik zeınetaqy qory (GPFG), álemdegi eń iri táýelsiz ál-aýqat qory 34 mlrd dollar kóleminde úlken shyǵynǵa ushyrady. Jalpy, Thinking Ahead Institute (TAI WTW) 22 zeınetaqy naryǵyn qamtıtyn zertteýi (P22) 2022 jyldyń sońynda zerttelgen elderdiń zeınetaqy aktıvteriniń jalpy kólemi bir jyl ishinde 15,4 paıyz, ıaǵnı 47,9 trln dollarǵa deıin tómendegenin kórsetti. Birden 22 eldiń ishinde damyǵan jáne damýshy 17 el shyǵynǵa ushyrady», deıdi Ranking.
Tabystylyq deńgeıine keletin bolsaq, jaǵdaı mynadaı: 2023 jyldyń ekinshi toqsanynyń sońynda zeınetaqy aktıvteriniń kiristiligi AQSh-ta – 4,1 paıyz, Kanadada – 1,3 paıyz, Eýroaımaqta – 1,2 paıyz, Shveısarııada – 1,7 paıyz, Ulybrıtanııada – birden mınýs 6,3 paıyz. Osylaısha, BJZQ zeınetaqy aktıvteri boıynsha ınvestısııalyq qyzmet nátıjeleri oń dep senimmen aıta alamyz: jahandyq jaǵdaıǵa qaramastan, el azamattarynyń zeınetaqy aktıvterin saqtap qana qoımaı, kóbeıtip jatyr.